Rokstu sagataveja: portals lakuga.lv

Īsadvesmojūt nu ituo gods pavasarī izdūtuos latgalīšu dzīšmu gruomotys “Muna dzīšmu gruomota” 7. novembrī Latgolys viestnīceibā GORS nūtiks latgalīšu dzīšmu koncerts “Dzīšmu gruomota”. Tymā skanēs gondreiž div desmitis tautā meilātu i labi zynomu latgalīšu dzīšmu, kai ari kaida varbyut mozuok zynoma.

Latgalīšu dzīšmu kruojumu “Muna dzīšmu gruomota” izdavuse bīdreiba “Latgolys Studentu centrs”. Kruojumā apkūpuotys 300 dzīsmis latgaliski – i tautysdzīsmis, i autordzīsmis, kurys aptver ap 100 godu ilgu periodu – nu 20. g. s. suoku da pat 2019. gods ūtrai pusei.

Vysys koncertā “Dzīšmu gruomota” īcarātuos dzīsmis atrūnamys itūgod izdūtajā dzīšmu kruojumā, dažys dzīsmis pīdzeivuos jaunu skaniejumu, dažom tys byus labi zynomais i godim puorbaudeitais. Gaidomi ari video par kotru dzīsmi, atkluojūt tuos rasšonuos i skaniešonys stuostus, par gaidomū koncertu informej tuo organizatori.

Koncertā “Dzīšmu gruomota” pīsadaleis apvīneibys “Raxtu Raxti” muziki, Artūrs Uškāns, Guntis Rasims, Kristaps Rasims, Arņs Slobožanins, Dainis Skutelis, Andris Baltacis, Guntra Kuzmina-Jukna i Rēzeknis nūvoda vokaluo studeja “Skonai”, Jurs Vucāns, grupa “Latgales dāmu pops”, Jurs Ostrovskis i Kārlis Kazāks.