Ar jaunu dzīsmi latgaliskajā muzykā atsagrīzs Weron Martin

Ar jaunu dzīsmi latgaliskajā muzykā atsagrīzs Weron Martin

Rokstu sagataveja portals lakuga.lv

Latgolys kongresa dīnā, 27. aprelī, sovu jaunū dzīsmi prezentēs grupys “Dabasu Durovys” muzikis Arņs Slobožanins i muzikis Weron Martin, kuram dzīsme byus atsagrīzšona latgaliskajā muzykā, viestej muziķa īroksts juo profilā socialajā teiklā “Facebook”.

27. aprelī, Latgolys kongresa dīnā, ari portala lakuga.lv skaiteituojim vīnim nu pyrmūs byus vareiba dzierdēt jaunū Arņa Slobožanina i Weron Martin dzīsmi “Muni pādi nava svāti”, kuruos īrūsme ir obeju muziķu sasatikšona i dzejnīka Valentina Lukaševiča jaunuo dzejis kruojuma “Pādi navā svāti” nūsaukums.

Weron Martin aba Verners Martinovs latgaliskajā muzykā tyka zynoms pyrma 15 godu, kod 2006. godā, sasadorbojūt ar basgitaristu Ingaru Viļumu, izdeve tūlaik cīši popularū dzīsmi “Dabasi raud”, kas beja vīna nu popularuokuos tuo laika dzīšmu Latgolys Radejis eterā, i 2007. godā, kod izguoja dzīsme “Pasoki maņ” ar Ilzis Spergys dzejis vuordim. Pa itū laiku Verners aktivi duorbuojīs vairuokūs muzykys projektūs, bet niu, sasadorbojūt ar grupys “Dabasu Durovys” muziki Arni Slobožaninu, latgaliskajā muzykā atsagrīzs ar kūpeigi radeitū dzīsmi “Muni pādi nava svāti”.

Jaunuos dzīsmis rosšonuos stuosts ir obeju draugu sasatikšona piec vaira nikai desmit godu, kod izrunuots par itū laiku pīdzeivuotais i sacynuots, ka laiki pasamainejuši, obeji dabuojuši kotrys cīši kruosainu dzeivis pīredzi, kotram natryukst sovejūs grāku, nu nivīns nivīna nadreikst nūsūdeit, jo kotram īts sovs ceļš i nivīns vys tik nav bez grāku, bet svareiguokais itūs godu laikā nav pasamainejs – sapyni vys vēļ tī poši.

Dzīsmis “Muni pādi nava svāti” autori ir obeji muziki – Arņs Slobožanins i Weron Martin, dzīsmis teksta īdviesme pasmalta Valentina Lukaševiča dzejis kruojuma nūsaukumā, pi dzīsmis produciešonys tolkā guojs grupu “Laime pilnīga” i “Carousel” gitarists, kai ari Vernera bīdrys muzykā Mārcis Vasilevskis, bet bungys īspieliejs Kaspars Pļavnieks.

Dzīsmis skaniejumā jau bejuse vareiba īsaklauseit Latvejis Radejis Latgolys multimedeju studejis latgalīšu literaturai veļteituo raidīroksta “Puslopys” sasatikšonys ar Valentinu Lukaševiču klauseituojim.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]