Vaļsts volūdys politikys pamatnūstuodnēs – ari latgalīšu rokstu volūdys atteisteiba

Vaļsts volūdys politikys pamatnūstuodnēs – ari latgalīšu rokstu volūdys atteisteiba

Rokstu sagataveja: portals lakuga.lv

24. augustā Ministru kabinetā apstyprynuotys Izgleiteibys i zynuotnis ministrejis izstruoduotuos Vaļsts volūdys politikys pamatnūstuodnis 2021.–2027. godam. Tys ir svareiguokais atteisteibys plānuošonys dokuments, kas nūsoka vaļsts volūdys politikā sasnādzamūs mierķus i īzeimej eistynojamūs aizdavumus tuoluokajim septenim godim, viesteits Ministru kabineta sātyslopā.

”Šudiņ apstyprynuotuos Vaļsts volūdys pamatnūstuodnis ir pyrmais dokuments, kurā konkreti i skaidri pasaceits, kaida ir vaļsts volūdys lūma. Mums vys vēļ ir juosariekinoj ar padūmu okupacejis nūsacejumu sekom vysu Latvejis dzeivuotuoju dzeivēs, partū latvīšu volūda ir kūpeja vierteiba vysim Latvejis dzeivuotuojim naatkareigi nu tauteibys, izceļsmis, dzymtuos volūdys, religejis i cytim apstuoklim,” soka izgleiteibys i zynuotnis ministre Anita Muižniece, dasokūt: ”Pamatnūstuodnis paceļ volūdu i juos apgivi jaunā leiminī, jamūt vārā sabīdreibā aktualus vaicuojumus. Ka īprīškejuos pamatnūstuodnēs akcents beja lykts iz kvantitativim volūdys apgivis ruodeituojim, tod niule uzsvors ir iz kvalitati i prasmis leimiņa paaugstynuošonu. Prūtams, ari volūdys vaicuojumūs asam cīši saisteiti ar pasaulī nūteikūšajim procesim, partū runojam i par volūdys apgivi imigrantim, i par volūdys lītuojumu digitalajā vidē, tymā skaitā, volūdys apgivē i pietnīceibā.”

Pamatnūstuodnis izstruoduotys, izviertejūt īprīškejā periodā eistynuotuos pamatnūstuodnis, pamatojūtīs iz pietejumu datim, kai ari konsultejūtīs ar ekspertim i sabīdreibys puorstuovim.

Vaļsts volūdys politikys viersmierkis tuoluokajim 7 godim ir nūdrūsynuot latvīšu volūdys kai vīneiguos konstitucionali nūsaceituos vaļsts volūdys ilgtspieju, juos lītuojumu vysuos sabīdreibys darbeibys jūmuos, sekmejūt volūdys izpieti i volūdys resursu atteisteibu i digitalizaceju, styprynūt sabīdreibys leidzdaleibu i individualū atbiļdeibu vaļsts volūdys politikys eistynuošonā.

Atbylstūši Vaļsts volūdys lykumā nūruodeitajam, itys viersmierķis realizejams, nūdrūsynojūt ari viesturiskuo latvīšu volūdys paveida ‒ latgalīšu rokstu volūdys ‒ atteisteibu i lībīšu volūdys kai vīneiguos pyrmdzeivuotuoju (autohtonu) volūdys Latvejā saglobuošonu.

 “Valsts valodas politikas pamatnostādnēs 2021.–2027. gadam” par latgalīšu volūdu saceits: “Latvīšu literaruos volūdys atteisteibys olūts vysod ir bejuši regionalī i teritorialī latvīšu volūdys paveidi. Latgalīšu rokstu volūda ir byutiska latgalīšu identitatis apzinis daļa i naatjamama Latvejis kulturys vierteiba. Nuokamajā volūdys politikys plānuošonys periodā veicami daudzveideigi atbolsta pasuokumi latgalīšu rokstu volūdys atteisteibai, izpietei i vuiceišonai vyspuorejā izgleiteibā i diasporā – latgalīšu rokstu volūdys īkļaušona nūvodvuiceibā, vuiceibu programu paraugu i vuiceibu materialu izstruode vysaidom vacuma grupom, pasuokumi latgalīšu rokstu volūdys populariziešonai, školuotuoju izgleituošona, vosorys nūmetnis. Kab atbaļsteitu latgalīšu rokstu volūdys normu izstruodi, VVC jau suokta latgalīšu rokstu volūdys eksperta pīsaiste, kas dūs organizatorisku i tehnisku atbolstu VVC Latvīšu volūdys ekspertu komisejis Latgalīšu rokstu volūdys apakškomisejis darbeibai, kai ari ryupēsīs par latgalīšu rokstu volūdys normu daīmameibu sabīdreibai i konsultēs interesentus.”

Ar pylnu pamatnūstuodņu tekstu var īsapazeit ITE.

Bolstūtīs iz datu analizi, identificāti 11 Latvejis volūdys politikys puorvaļdeibai byutiskuokī nuokamajā septeņgadē rysynomī vaicuojumi, vīns nu jūs – nasistematisks atbolsts latgalīšu rokstu volūdys izpietei i atteisteibai.

Pi volūdys politikys rezultatu atzeimuoti: daīmams digitals reiks latgalīšu rokstu volūdys apgivei, papyldynuots latgalīšu rokstu volūdys korpuss i izveiduots mutvuordu tekstu korpuss. Par rezultatu teik pīzeitys ari sabīdreibai snāgtuos mutvuordu, elektroniskys i kluotīnis konsultacejis, t. sk. latgalīšu rokstu volūdys i lībīšu volūdys vaicuojumūs.

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]