Baļtinovā tiks filmāts raidejums “Tas notika šeit”
Rokstu sagataveja: portals lakuga.lv
Baļtinovā filmu studeja “Mistrus Media” sadarbeibā ar Latvejis Televizeju (LTV) veiduos raidejumu par vītu viesturi “Tas notika šeit”. Vysus, kurim zynomi aizraunūši stuosti i legendys par Baļtinovys pogostu, aicynoj 8. i 9. septembrī atīt iz Baļtinovys kulturys nomu i atkluot jūs treis viesturnīkim i Dāvidam Ernštreitam, viestej informaceja socialajūs teiklūs izplateitajā LTV i “Mistrus Media” afišā.
10. septembrī 18.00 stuņdēs Baļtinovys parka estradē nūtiks raidejuma filmiešonys nūslāguma pasuokums. Tymā viesturnīki atkluos, kū izzynuojuši par Baļtinovys pogostu, sovutīs atguojušī varēs nūbolsuot par vairuok īsapatykušū stuostu.
Dokumentalais serials “Tas notika šeit” tyka suokts, sagaidūt Latvejis vaļsts symtgadi, LTV eterā pyrmais raidejums beja radzams nu 2018. gods 13. oktobra. Daļa arhiva raidejumu nūsaverami portalā lsm.lv. Da ituo nu Latgolys vītu raidejuma veiduotuoji ir gastejuši Vuorkovā i viesturiskajā Latgolys zemē Borkovā.
Raidejumā par Borkovu var dzierdēt stuostu par Aloizu Trūpu, redzēt dobā atrostū viesturiskū rūbežu storp Vydzemi i Latgolu, Krīveju i Eiropu, kurys pusē vīnušaļt atsaroda Latgola, na Vydzeme, cauri vysam vaicuojums par vītejūs identitate – latgalīši voi vydzemnīki. Raidejumu var nūsavērt ITE.
