11. novembrī tīšsaistē byus pyrmizruode eisfilmai “Stikla pūšanas tradīcija Līvānos”
Rokstu sagataveja: portals lakuga.lv
Šudiņ, 11. novembrī, 19.00 stuņdēs Leivuona stykla i amatnīceibys centra “Facebook” kontā varēs nūsavērt eisfilmu “Stikla pūšanas tradīcija Līvānos”. Piec juos grybātuoji eisfilmu nu 23. novembra leidz 23. decembram bez moksys varēs nūsavērt ari Leivuona stykla i amatnīceibys centrā.
Leivuona stykla i amatnīceibys centra vadeituoja Ilze Griezāne stuosta, ka eisfilmys mierkis ir stuosteit cylvākim par stykla pyusšonys tradiceju: “Pamozam vysys sovys dūmys vieršom iz tū, lai atguodynuotu cylvākim par itū omotu, atguodynuotu par Leivuona styklu, mums ir ari stykla pyusšonys darbneica, taidā veidā mes uzturom dzeivu itū tradīceju. Sykla pyusšona Leivuonā ir īkļauta Latvejis Namaterialuo kulturys montuojuma sarokstā.”
Filmu izveiduot motivēja ari pandemejis laiks. “Īrūbežuojumi naļuove ruodeit cylvākim pyusšonys procesu, saprotom, ka zaudejom sovu apmaklātuoju, lykuos, ka par mums otkon ir juostuosta. Ka agruok tū darejom stykla pyusšonys darbneicā, tod niu par itū Latvejā ratū omotu stuosteisim caur eisfilmu,” skaidroj Ilze. “Tymā mes stuostom par sevi – Leivuona stykla i amatnīceibys centru, Leivuona stykla muzeja kolekceju, stuostom par stykla pyutiejim – gon asūšajim, gon bejušajim, par tū, kas ir stykls i kai ar jū struoduot.”
Skateituoji caur intervejom varēs vaira īpazeit Leivuona stykla fabrikys bejušūs stykla pyutiejus Jāni Kotleru, Alekseju Gordikovu, Genādiju Titovu, Vladimiru Čakšu, kai ari Aleksandru Logvinu, kas ar stykla pyusšonu nūsadorboj vēļ šudiņ. Eisfilmā stuosteis ari par Leivuona stykla apstruodis tradicejom i viesturi – Leivuonā styklu pyuš jau nu 1887. goda.
“Tod, kod apmaklātuojs varēs atbraukt pi mums gostūs, jis jau zynuos viesturi, zynuos, kai nūteik stykla pyusšona, jam byus prīškstots,” ar cereibu iz prīšku verās centra vadeituoja. “Eisfilmai ir subtitri, kab padareitu jū daīmamu cylvākim, kas ir vuojdzierdeigi. Filmai byus ari variants angļu volūdā ar subtitrim krīvu volūdā, dūmojom filmu piečuok ruodeit ari kaidā konferencē.”
Eisfilma “Stikla pūšanas tradīcija Līvānos” topuse ar VKKF mierkprogramys “KultūrElpa” atbolstu.
