Rokstu sagataveja: portals lakuga.lv

Majā portals lakuga.lv raksteja par tū, kai ituogods 8.–9. maja breivdīnuos nu Fraņča Trasuna muzeja “Kolnasāta” krysta pagaisa mūceņa – kūktieļnīka Ontona Rancāna veiduotais Jezus Kristus tāls ITE. Pasateicūt Sakstagola pogosta puorvaļdis finansialam atbolstam, rudiņ muzeja uobeļu suodā asūšajā krystā nu jauna tyka izlykta O. Rancāna veiduotuo mūceņa. 25. novembrī, Katrinys dīnā, kluotasūt muzeja darbinīkim i Sakstagola pogosta puorvaļdis vadeituojai Tamārai Tutinai, jū īsvietēja Cyskuoda Sv. Juoņa Kristeituoja bazneicys prīsters Imants Petrovskis, portalu lakuga.lv informēja F. Trasuna muzeja “Kolnasāta” direktoris p. i. Inta Deksne.

I. Deksne doluos puordūmuos par uora krystu nūzeimi Latgolā: “Katoliskuos Latgolys fenomens ir krysti, kas parosti beja pastateiti krystceļūs i kolpuoja par sovpateigom breivdobys bazneicom, kur religiskuos ceremonejis parosti nūtyka bez prīstera kluotbyušonys. F. Trasuns cielīs nu katuoļticeigys saimis, kas ītekmēja juo profesionalū izvēli i  pasauļa redziejumu. Pyrma vairuok kai symts godim Latgolā ticeibai beja lela nūzeime – bez vysaidu religisku ritualu nabeja īdūmuojama cylvāku kasdīna. Latgolā valdūšais katuolicisms sovys saknis te beja laids jau pyrma vairuokim godu symtim.

Ari F. Trasuna muzeja “Kolnasāta” uobeļu suodā ir krucifikss, ar kura atkluošonu 1991. godā aizasuoce gareidznīka, politiķa, kulturys i sabīdryskuo darbinīka F. Trasuna pīminis atjaunuošona Latgolā. Itū krystu darynuojs kūktieļnīks O. Rancāns. Ar aizlyugumu pi krysta parosti suocās vysi leluokī pasuokumi muzejā. Majā pi krysta kotru dīnu puļcejās vītejī ticeigī, kab veļteitu lyugšonys Jaunovai Marijai. Tok itūgod ticeigūs puorsteidze napateikams nūtykums – maja suokumā nu krysta beja pazuds Jezus Kristus tāls. Vysi mekliejumi, sadarbeibā ar Vaļsts policeju, beja naveiksmeigi.”

Īmūt leidza laikam, tān ir īreikuota videonūvāruošona na viņ muzeja ākom, tok ari krystam.

Foto: Inta Deksne i Edeite Husare

[Show slideshow]