Kinu konkursā “Latvijas kods” taps stuosts par dzejnīku Eināru Pelšu

Kinu konkursā “Latvijas kods” taps stuosts par dzejnīku Eināru Pelšu

Rokstu sagataveja: portals lakuga.lv

Latvejis Televizeja paviestejuse dokumentalūs eiskinu konkursa “Latvijas kods. Latvija šodien” 2022. goda uzvarātuojus. Tymā pīcu stuostu vydā, dokumentejūt Latveju, byus ari režisoris Betijis Zvejniecis kina par dzejnīku i atdzejuotuoju nu Preiļu Eināru Pelšu.

Kotru godu kinu cykla “Latvijas kods” mierkis ir padzilinuoti pieteit ituos dīnys Latvejis realitati. 2022. goda filmu izlase pīduovuos daudzveideigu Latvejis myusu laika portretiejumu, atsadzūt itam laikmatam rakstureigus paradoksus, fenomenus i nūvārojumus. Ituo gods kinu temuos dominēs pylsūniska i sociala leidzdaleiba, kulturys montuojums i sabīdreibys pošreflekseja.

Konkursā itūgod atbolstu dabuojušys pīcu režisoru kinys, nu kurūs trejim režisorim ituos byus debejis filmys. Sūpluok Mārtiņa Jansona “Lapsas āda”, Unys Cekulis “Viena maza ballīte”, Ivara Zviedra “Birokrātijas līķis” i Mārča Ābelis i Laura Ābelis “Pilnmēness serenāde” itūgod taps ari Betijis Zvejniecis kina “Einaratīvs”.

“Einaratīvs” byus stuosts par dzejnīku i atdzejuotuoju nu Preiļu Eināru Pelšu. Filmys anotaceja viestej, ka Pelšs dzeju ar puortraukumim roksta jau 44 godus, jam izdūti deveni dzejis kruojumi, nu kurūs pyrmī ir tradicionali, nu pādejī – piļneigs avangards, par pīmāru, dzejis kartys, ceglys, gruomota bez puslopu i tml. Jaunuokais dzejis kruojums – kūpūti roksti “Digi. Dīgi” izguojuši 2020. godā Valtera Dakšys izdevnīceibā i tymā ir puorskaitomi ari latgaliski raksteiti dorbi. Dzejnīka eksperimentalajūs kruojumūs izmontuotys na viņ raksteituo vuorda, nu ari dažaidu grafisku i škārsteiklā atrastu zeimu īspiejis, taidā veidā padorūt plotuokus latvīšu myusu dīnu dzejis rūbežus. Gastejūt pi Eināra Pelša Preiļūs, vairuoku Latvejis dzejnīki ir sataisejuši jaunu dzejis vierzīni – Preiļu konceptualismu. Ar tū gols golā ari Latvejā asūt aktualizāti konceptuali dzejis izteiksmis leidzekli i formali eksperimenti dzejā. Preiļu konceptualisma puorstuovi itūšaļt ir zynomuokī Latvejis dzejnīki, nu kurūs leluokuo daļa ir ari literaturzynuotnīki i pietnīki. Vaira par Preiļu konceptualismu varēja izzynuot raidejumā “Literatūre”.

Gotovī kinu dorbi Latvejis Televizejis eterā byus nūsaverami novembrī, vaļsts svātku laikā.

“Einaratīvs” nabyus pyrmais stuosts par Latgolys cylvākim, kas taps konkursā “Latvijas kods”. 2019. godā sataiseits stuosts “Prīsters” par prīsteri Rinaldu Broku, bet 2016. godā pyrmizruodi pīdzeivuoja Daiņa Kļavys kina “Runātāji” par latvīšu volūdys dažaideibu. “Runātāji” sovulaik sajēme ari Latgalīšu kulturys goda bolvu “Boņuks 2016” par lobuokū snāgumu audiovizualajā muokslā.

Print Friendly, PDF & Email

Kalenders

May
18
Sai
10:00 Muzeju nakts @ Maltys viesturis muzejs
Muzeju nakts @ Maltys viesturis muzejs
May 18 @ 10:00 – 21:00
Muzeju nakts “Izzinot latgaliskās rotas, tērpus un stāstus”10.00 Pietnīcysks (izzynojūšs) ceļuojums pa Maltys apleicīnis piļskolnim ar viesturis aktivistu i konstruktoru bīdreibu “Kroma kolna bruoliste”.16.00-18.00 Darbneica “Seno latgaļu rotu rakstu noslēpumi” (7.-13. g. s.), kurū vadeis[...]
15:00 Muzeju nakts @ Naujinis Nūvodpietnīceibys muzejs
Muzeju nakts @ Naujinis Nūvodpietnīceibys muzejs
May 18 @ 15:00 – 23:45
15.00 – 24.00 Apmaklātuojim daīmamys jaunuos izstuodis: viesturis izstuode “Juzefovas stacija: ceļojums laikā”, izstuode nu muzeja kruojuma “Valentīnas Zeiles dažādās sejas: dzejniece”, izstuode “Livonijas ordeņa Dinaburgas pils senlietas muzeja krājumā”, breivdobys izstuode muzeja teritorejā “Novadnieku[...]