Jiurys spāku orkestra bigbenda albumā skaņ “Auga, auga rūžeņa” džeza versejā
Rokstu sagataveja: portals lakuga.lv
Jiurys spāku orkestra bigbends izdevs džeza muzykys albumu “Veltījums tautasdziesmai”, kurymā 11 dzīšmu vydā jaunā džeza versejā skaņ ari latgalīšu dzīsme “Auga, auga rūžeņa”, viestej Nacionalūs bruņuotūs spāku golvonuo dirigenta Anda Kareļa sagataveituo informaceja.
Jaunū albumu “Veltījums tautasdziesmai” orkestra bigbends izdevs kai veļtejumu Jiurys spāku atjaunuošonys 30. godadīnai. Tymā īkļautuos tautysdzīsmis specialai Jiurys spāku orkestra bigbendam leluokā daļā aranžiejs leitovīšu komponists Rimantas Giedraitis, viņ albuma nūslādzūšū kompoziceju “Čuči, guli, līgaviņa” taisejs latvīšu džeza legenda Gunārs Rozenbergs vēļ padūmu okupacejis laikā.
Albumā skaņ 11 Latvejā zynomys tautysdzīsmis i tūs vydā ari latgaliskuo “Auga, auga rūžeņa”. “Latvīšu tautysdzīsmis ir kulturys pamats, tuos ir myusu vysa leluokuo boguoteiba. Tautysdzīsmēs var dabuot dzeivisziņu, padūmu i pasasmeļt spāka. Asu eistyn gandareits, ka kūpā asam padarejuši itaidu lelu dorbu,” par albumu soka dirigents, kapteiņs Andis Karelis.
“Veltījums tautasdziesmai” ir daīmams nūsaklauseišonai vysūs popularuokajūs muzykys digitaluos straumiešonys servisūs (Spotify, Deezer, YouTube Music), kai ari Jiurys spāku orkestra YouTube kanalā.
Jaunais albums īskaņuots Nacionalūs bruņuotūs spāku dirigenta Anda Kareļa vadeibā, tuo skaņu režisors ir Kristaps Krievkalns, bet īrokstu miksiejs i masteriejs Armands Treilihs. Īrokstā pīsadalejuši Jiurys spāku orkestra muziki, kurūs vydā instrumentalī solisti – Andis Ločmelis (alta, soprana saksofoni, elektroniskais saksofons), Agris Bušs (tenora saksofons), Deniss Seimuškins (trompete), Tuoms Jansons (vibrafons), Kaspars Jekševics (trombons), Levs Rotbards (trombons) i Dzintars Vītuols (gitara), Zemessardzis orkestra muziki, tūs vydā instrumentalī solisti – Valters Gotlaufs (bungys) i Matīss Žilinskis (tausteņinstrumenti), kai ari Nacionalūs bruņuotūs spāku Štaba orkestra muzikis Gatis Supe (vokals).
Jiurys spāku orkestris dybynuots 1995. goda 6. junī i tuo pamatfunkceja ir militarūs ceremoneju muzykalais nūformiejums, profesionala koncertdarbeiba i pīsadaleišona storptautyskūs militarūs i profesionalūs pyutieju orkestru festivalūs. 2009. godā Jiurys spāku orkestris tics puortaiseits par džeza orkestri, tū puorsaucūt par Nacionalūs bruņuotūs spāku bigbendu, bet nu 2019. gods bigbends otkon ir atsagrīzs Jiurys spākūs i puorsaukts par Jiurys spāku orkestri.
