Rokstu sagataveja: portals lakuga.lv

Kulturys īsacejumus itai nedeļai sagatavejuse Latgalīšu kulturys ziņu portala lakuga.lv praktikante Beāte Poikāne, kura studej Daugovpiļs Universitatis storpkulturu attīceibu magistra studeju programā. Tai kai itūnedeļ palīk 32 godi, kai atjaunuota Latvejis vaļsts naatkareiba, ari Beātis īsacejumi ir vairuok voi mozuok patriotiskā zeimē.

Apveļc tautystārpu!

4. majā, svietejūt Latvejis Republikys naatkareibys atjaunuošonys godadīnu, sevkurs teik aicynuots aplīcynuot sova regiona identitati, apvalkūt i pīsadolūt tautystārpu guojīnī. Vysleluokais guojīņs nūtiks Reigā, nu rātslaukuma da Breiveibys pīminekļa, tok leidzeigs guojīņs paradzāts ari Baļtinovā (vaira par itū pasuokumu var izzynuot ITE). Īprīškejūs div godus akceja nūsarysynuoja digitali, publicejūt kartenis interneta vidē ar atzeimi #tautastērpugājiens. Ari itūgod uorvaļstīs dzeivojūšī latvīši voi tī, kuri navarēs apmeklēt guojīni, teik aicynuoti nūsabiļdēt ar sovu tautystārpu.

Vuicīs senejūs omotus!

Ludzys amatnīku centrā īspiejams paraudzeit vysaidus senejūs omotus, par pīmāru, pīsadolūt audieju i keramiku darbneicuos, kai ari baudeit Latgolys tradicionalūs iedīņus Latgolys kuknē ci braukt ar plūstu pa Mozū Ludzys azaru. Amatnīku centra salonā īspiejams īsaguoduot ari dažaidus meistaru darynuojumus.

Apzynoj sovys saknis!

Rodu rokstu pieteišona ir veids, kai tikt pi jaunu zynuošonu i atsavaidzynuot jau asūšuos saisteibā ar sovys dzymtys viesturi. Apzynuojūt sovys saknis, īspiejams tikt pi skaidruokys regiona viesturiskuos kūpainys, par pīmāru, kai dažaidi nūtykumi Latvejis viesturē ir ītekmiejuši myusu seņču liktiņus. Pietnīceiba ari dūd vareibu apsazynuot sovu identitati i pīdareibu sovam dzymtajam nūvodam.