Voi Breivdobys muzeja godatiergs itūgod bez Latgolys amatnīku?

Voi Breivdobys muzeja godatiergs itūgod bez Latgolys amatnīku?

Rokstu sagataveja: portals lakuga.lv

Jau nu 1971. goda Latvejis Etnografiskais breivdobys muzejs reikoj diveju dīnu godatiergu, kas tradicionali nūteik juņa pyrmajā nedeļgolā. Itūgod godatiergs nūtiks 4.–5. junī. Kotru reizi tymā pīsadola ari daudz amatnīku nu Latgolys, tok itūreiz Lakuga.lv redakceja sajēme drupeit satrauktu viesti, ka itūgod Breivdobys muzejā Latgolys amatnīki nav gaideiti gosti. Raudzejom saprast lītys byuteibu.

Pīcdesmit pastuoviešonys godu laikā Breivdobys muzeja godatiergs ir palics par nūzeimeigu nūtikšonu i tradicionaluos kulturys i amatnīceibys simbolu. Tys ir pasuokums, kurā sasateik tautys lītiškuos muokslys izstruoduojumu darynuotuoji nu vysu Latvejis kulturviesturiskūs nūvodu. Tei ir vareiba amatnīkim paruodeit i puordūt sovus izstruoduojumus.

Pīsadaleit godatiergā teik aicynuoti amatnīki, kuri darynoj tautys lītiškuos muokslys izstruoduojumus par pamatu jemūt myusu tautys arheologiskū i etnografiskū montuojumu. Taipoš godatiergā teik gaideiti ari tradicionalūs omotu pratieji: audieji, rūkdarbnīki, tārpu darynuotuoji, kaļvi, pinieji, keramiki i cyti. Godatiergā pīduovuotajim dorbim juobyut kvalitativim, pošu amatnīku taiseitim i izgatavuotim nu tradicionalu materialu.

Napaseņ portala lakuga.lv redakceja sajēme anonimu viesti, ka itūgod Breivdobys muzejā Latgolys amatnīki nav eisti gaideiti gosti. Prūti, ka itūgod oficialūs tierguošonuos atļuovu nūkuortuošona ir napīdūdami aizakavējuse, leidz ar tū pamatūt amatnīkus naziņā, voi vyspuor byus vareiba pīsadaleit godatiergā, i voi ir jāga gatavuotīs. Amatnīkim napuortraukti nav daīmama gotovuo produkceja, leidz ar tū ir cīši svareigi aiz laika zynuot kaidim pasuokumim juosagatavej. Taipoš anonimi tyka izsaceits komentars, ka itūgod Breivdobys muzeja styngruo koncepceja par godatierga dalinīku atlasi ir palykuse vyspuoreiguoka, nalīkūt uzsvoru iz tautys lītiškuos muokslys vierteibom i amatnīkim, kuru dorbu kvalitate ir puorbaudeita cauri godim. Itūšaļt amatnīkim ari nav skaidrys, kur atsarass jūs tierguošonuos vīta (respektivi – nav izsnāgtys caurlaidis) i izaver, ka vysi Latgolys tierguotuoji naatsarass kai parosti vīnā vītā, tok byus izsvaideiti pa vysu tierga teritoreju.

Kab izprast obeju pušu nūstuoju, sasazynuojam ari ar Etnografiskuo breivdobys muzeja puorstuovim. Direktore Zanda Ķergalve skaidroj: “Kai muzeja puorstuovs grybu pastreipuot, ka vys vēļ asam atvārti sadarbeibai ar vysu Latvejis nūvodu amatnīkim i ar lelu prīcu atguodojam 2021. gods septembri, kod muzejā nūtyka Latgolys dīnys. Itūgod pīsasaceišona iz godatiergu tyka izsludynuota iz reizis piec tuo, kai vaļstī atcēle īrūbežuojumus publiskim pasuokumim. Dūmojūt par tū, ka div pandemejis godi nūzarei ir bejuši cīši sarežgeiti, pīsasaceišona iz godatiergu beja īspiejama kotram interesentam, kas atbylst godatierga koncepcejai i izstruoduotajam nūlykumam. Vīneiguo byutiskuo atškireiba nu cytu godu ir elektroniskuo pīsateikšonuos anketa. Muzejs itūgod ir rads vareibu sovā teritorejā izvītuot 550 tierguotuojus i ceņtīs pīsaturēt pi asūšuo dalinīku izvītuojuma muzeja mežu i pļovu teritorejā, kas vys ilgtermiņā ir maineiga, kas nūzeimoj, ka mainuos ari tierdznīceibys vītu izvītuojums. Kab rūsynuot piec vareibys leluoku jaunīšu iņteresi par amatnīku prasmu nūdereigumu i realu vajadzeibu sadzeivē, itys godatiergs ir breineiga vareiba, kur apsavērt vysys Latvejis kūpainu i nūzaris atteisteibys teņdencis. Myusu dīnu amatnīku tendeņču īnesšona nikai navar izmaineit godatierga tālu, viņ rūsynuot īsadvesmuot jaunim pietejumim i rodūšuom izpausmem, kab lapnys byutu pats amatnīks i prīceigs apmaklātuojs!”

Uzrunuojam ari keramiku kūpys “Pūdnīku skūla” keramiki Eviju Vasilevsku, kura mīrynūši apstyprynuoja, ka Breivdobys muzeja godatiergā byus ari gona daudz Latgolys puorstuovu: keramiku, uodys izstruoduojumu meistaru, tekstilmuokslinīku i cytu amatnīku. Evija viņ izsoka cereibu, ka cytugod byus vareiba daudz mudruok nūkuortuot oficialū pīsateikšonu, kab tys nabyutu pādejuos šaļts sasteigts i satraukumu pylns process.

Kartenis: Latvejis Etnografiskuo breivdobys muzeja arhivs.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]