Voi vari uzminēt kinu piec kadra? Jauns “Im a’mazed” video

Voi vari uzminēt kinu piec kadra? Jauns “Im a’mazed” video

Rokstu sagataveja: portals lakuga.lv

Naformaluos izgleiteibys i kulturys Youtube platformys kanalā “Im a’mazed” tikū izguojs jauns video ar atraktivu spēli “Atmini kinu piec kadra”. Itamā reizē pīsadaleja četrys atraktivys komandys.

Vēļ 2020. goda nūslāgumā startēja pyrmais latgalīšu izklaidis, naformaluos izgleiteibys i kulturys Youtube platformys kanals “Im a’mazed”. Ituo kanala mierkis ir radeit i pīduovuot jaunu cylvāku publikai aktualu, originalu, interesnu i myusdīneigu Youtube audiovizualu produktu cyklu latgaliski, naformali styprynojūt latgaliskū identitati i volūdys lītuojumu, sabīdreibys i individu pošapziņu.

Itūšaļt kanalā jau ir vairuoki desmiti video par vysaiduokom temom. Niu izguojs ari jauns video-spēle “Atmini kinu piec kadra”, itamā reizē pīsadaleja četrys atraktivys komandys. Spēlē ir desmit raundi, kotrā treis kadri nu kaidys kinys. Ka spālātuojs atmiņ kinu ar pyrmū kadru, tod sajem treis punktus, ar ūtrū kadru – divejus punktus i ar trešū kadru – vīnu punktu. Atbiļde teik īskaiteita tam, kurs pyrmais damīdz pūgu.

Kai skaidroj vīna nu idejis autorem Viola Lapa, ituo kanala mierkis ir paruodeit, ka pasauleigys lītys i aktivitatis var dareit latgaliski, ari nalīkūt akcentu iz tuo, ka tys nūteik latgaliski aba vīnkuorši paruodeit, ka ar itū volūdu var dzeivuot.

Viola ari skaidroj: “Mes raudzejom meklēt kompromisu, kai nūdereigū informaceju apvīnuot ar izklaidejūšū. Jū mozuok mes pastreipuosim, ka myusu volūda ir nazkas eksotisks i izmierstūšs, jū vaira cylvāki nasabeis runuot.”

Ūtrs projekta idejis autors Guntis Rasims ari dasoka: “Daudzim ir gryuši taišni suokt runuot, partū ka uzatrauc, voi runoj pareizi, deļtam itys ir veids, kai tam cylvākam īdūt drūsmi.”

Regita Zeiļa, kura ir pīsadalejuse jau vairuokūs video, stuosta: “Kūpumā maņ pateik dūma, ka latgaliski ir pīejams myusdīneigs saturs jaunīšim. Īspiejams, ka gona daudzim tys līk padūmuot par latgaliskū savaižuok. Svareigi, ka tys nav standarta stils, kur vysu laiku atsakuortoj vīni i tī poši “pīredzis” stuosti par latgalīšim kai dinozaurim.”

Projekts teik realizāts ar Latgolys kulturys programā sajimtū Latgolys regiona atteisteibys agenturys, Vaļsts kulturkapitala fonda i A/S “Latvijas meži” finansialū atbolstu. 

Print Friendly, PDF & Email

Kalenders

Mar
1
Pīk
all-day Izstuode “Latgales līgavas pūra ... @ Vīneibys noma Tradiceju sāta
Izstuode “Latgales līgavas pūra ... @ Vīneibys noma Tradiceju sāta
Mar 1 all-day
Izstuodē apsaverami folkloristis Intys Viļumys apkūpuotī prīškmati, kas rakstureigi 19. g. s. Vydslatgolys jaunivis pyuram. Nu jaunivis vaiņuka leidz pat dečam. Izstuode apsaverama kotru dorba dīnu nu 11.00 stuņžu, īprīšk sasazynojūt ar Tradiceju sātys puorstuovim[...]
19:00 Grupys “Galaktika” albuma prezen... @ Slampis kulturys piļs
Grupys “Galaktika” albuma prezen... @ Slampis kulturys piļs
Mar 1 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]
19:00 Večerinka @ Gertrudis īlys teatris
Večerinka @ Gertrudis īlys teatris
Mar 1 @ 19:00 – 21:00
“Grodi” muzicēs i aicynuos doncuot vysus – muocātuojus i namuocātuojus, vacus i jaunus, garus i eisus. Spielēs mozuok i vaira zynomus Latgolys daņčus, rūtalis, dzīsmis. Vokora daņču meistars i sūļa īruodeituojs – Jevgenijs Mickēvičs.  [...]