Kulturys īsacejumi nedeļai: Latgolys zyrgi, bazneicys svātki i gruomota par nūstuošonu

Kulturys īsacejumi nedeļai: Latgolys zyrgi, bazneicys svātki i gruomota par nūstuošonu

Rokstu sagataveja: portals lakuga.lv

Itamā svātdīnē vairuokuos Latgolys bazneicuos tiks eipaši svieteita Annys dīna. Vīna nu vītu, kur tī vysod ir leli svātki, ir ari Bierzpiļs, kū par sovu vacuoku dzymtū pusi sauc i tamā bierneibys vosorys pavadejuse kulturys žurnaliste Eva Johansone. Saprūtams, ka Eva vysus aicynoj apmeklēt, piec juos dūmu, vysskaistuokū Latvejis bazneicu, kai ari īsoka izzynūšu pīdzeivuojumu kūpā ar bārnim i gruomotu par atsagrīzšonu nullis punktā.

Latgolys raņčo

Tī, kuri ceļoj ar bārnim, nūviertēs Bolvu nūvodā asūšū raņčo “Ozolmājas”. Ostoņu hektaru plotajā teritorejā var apsavērt vysvysaidus dzeivinīkus: kameļus, zyrgus, Afrikys sovvalis gūvs, ponejus, kozys, vuškys, alpakys, pat kenguru puoreiti. Taipat ari vairuoku škirņu ezeļus – miniaturūs, klasiski palākūs, raibūs, kai ari garspolvainūs pynkainūs fraņču ezeļus i piļneigi boltu ezeli aļbinu ar gaiši zylom acim. Tī dzeivoj vysaiduoki putyni: puovi, dekorativī bolūži i kruosainī fazani, kai ari sātys putyni: kurkyni, zūss, peilis i vistenis. I, prūtams, truši, daudz trušu. Jim pošim ir sovs raņčo, kurā var īt vydā samīļuot, pagluostet i pabaruot mozūs pūkaiņus. Bez dzeivinīku apsavieršonys, īspiejamys ari cytys rodūšys aktivitatis. Apmekliejums tik ar īprīškeju pīsasaceišonu dorba dīnuos i breivdīnuos, izjamūt pyrmūdīnis. Vaira par saimisteibu var atrast ITE.

Gruomota par nūstuošonu

Bejušais reklamists, riezeknīts Raimonds Platacis vysus puorsteidzs, pīrokstūt naparostu “Grāmatu par nonullēšanos”. Bolta, asketiska dizaina gruomota ar fotografejom, kurā jis aproksta sovu ceļu iz nūstuošonu. Tycu, ka temats itūšaļt aktuals daudzim, kurūs skuoruse puorsastruoduošona i izdegšonys sārga. Raimonds patīsai aproksta grubuļainū ceļu iz sevis mekliejumim, kai ari doluos atziņuos, kū saprats itymā laikā. Juo dīnysgruomotā var skaiteit kai par Latvejis reklamys industrejis aizkulisem, tai par atsagrīzšonu sovā nullis punktā i jaunu, rodūšu ideju eistynuošonu Latgolā.

Vysskaistuokuo bazneica

Bierzpilī, 24. julī, 10.00 stuņdēs nūtiks Bieržu Sv. Annys Rūmys katuoļu draudzis svātku Svātuo Mise ar proceseju. Pa manim, itei ir vysskaistuokuo Latvejis bazneica – eipaši, ka verās nu centraluos īejis pusis. Tei izcalta 1851. godā, vys vēļ sagloboj gaišumu, mīru i gareigu patvārumu tim, kuri tū meklej. Dīvnoma varganis ir vīnys nu vysvacuokūs kegeladis sistemys varganem Latvejā. Bazneicā ir četri oltori. Golvonais centralais oltors ir myura ar četrim pilarim, kurā atsarūn Jaunovys Marijis ar Kristus nūjimšonu nu krysta glezna, kurai prīškā ir nūlaižama Dīvmuotis glezna zeļteitā apdarē. 

Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]