“Diplomāts”, “Austrumi” i Breiveibys pīminekļa flizis – Leivuona stykla muzeja kruojuma duorgumi

“Diplomāts”, “Austrumi” i Breiveibys pīminekļa flizis – Leivuona stykla muzeja kruojuma duorgumi

Roksta autore: Laura Melne, portals lakuga.lv

Portals lakuga.lv turpynoj rokstu sereju, kurā reizi mienesī īpazeist kaidu Latgolys muzeju i tuo kruojuma duorgumus. Itūreiz bejom gostūs Leivuona stykla i amatnīceibys centrā, kur apsaverama ari Leivuona stykla muzeja ekspoziceja. Lai ari, kai soka centra darbineicys, par kotru eksponatu varātu stuosteit cīši daudz, itūreiz atlaseiti treis eipašuoki stuosti – par gluožu komplektu “Diplomāts”, trauku komplektu “Austrumi” i flizem, kurys var redzēt Breiveibys pīmineklī.

Leivuons daudzim asociejās ar styklu, i tys nav nikaids breinums – itamā piļsātā 121 godu (1887–2008) dorbuojuos stykla fabrika. Laika gaitā tei saražuojuse vysvysaidus prīškmatus nu stykla – nu vysparostuokūs kasdīnys trauku leidz vyseistuokajim muokslys dorbim, nu parosta caurspeideiga stykla leidz tuo izstruoduojumim vysuos dzeļvēderis kruosuos. Jau fabrikys darbeibys laikā, 1979. godā, izveiduota Leivuonā taiseitūs trauku ekspoziceja, tok ar tū guojs vysaiž – kaidu laiku dorbs veikts ryupeigai i sistematiski, cytreiz otkon vaira atstuots pošplyusmā. 2013. godā itū kolekceju, kas ir leluokuo Baļtejā, puorjēme tūreizejais Latgolys muokslys i amatnīceibys centrs. Tī niu atsarūn ari stykla pyusšonys darbneica, turpynojūt Leivuonā saglobuot i atteisteit stykla tradicejis. Partū ari lykumsakareiga bejuse centra nūsaukuma maiņa paguojušajā godā – niu tū sauc par Leivuona stykla i amatnīceibys centru.  Kai stuosta centra vadeituoja Ilze Griezāne, īprīškejais nūsaukums bejs cīši ambiciozs i eistineibā nikuo tik daudz saisteibā ar Latgolys muokslu jī vaira naasūt darejuši, partū ka leluokuo viereiba tyka pīvārsta styklam. Styklys vysu asūt puorjiems!

Stykla pyusšonys meistars Aleksandrs Lovgins dorbā stykla pyusšonys darbneicā. Kartenis autore: Amanda Anusāne/portals lakuga.lv

Itūgod tyka izsludynuota akceja, kod sevkurs iz centru var vest sovā eipašumā asūšus, bet varbyut vaira navajadzeigus Leivuona stykla fabrikys traukus. Ilze Griezāne soka, ka atsauceiba asūt gona lela, par kū jei ir cīši pateiceiga i aicynoj atsasaukt ari cytus, kam sātā putekļus kruoj koč kas nu Leivuona stykla. “Mes gribiejom pasaceit, ka Leivuona stykla trauki ir vierteiba – lītojit poši voi ari atdūdit mums, ka jums navajag. Mes par tū byusim tik prīceigi! Pa itū vosoru ir atvasts cīši daudz, trauki kruojās, dūmojam, kur varātu tūs izlikt. Ir ari, prūtams, taidi trauki, kuri mums jau beja, ari par tim ir vysaidys idejis. Varbyut varātu, pīmāram, cylvākim pīduovuot koč voi kokteili īdzert nu Leivuona stykla gluozis!” smejās Ilze. Juodasoka, ka Leivuona nūvodā nav nivīna akreditāta muzeja, ari stykla muzejs vēļ nav akreditāts, tok rauga dorbuotīs atbylstūši vysim muzeja darbeibys principim.

Gluožu komplekts “Diplomāts”

Kartenis autore: Amanda Anusāne/portals lakuga.lv

Itys komplekts radeits 1977. godā, tuo autore – Ludmila Safronova. Muokslinīku nūdaļa Leivuona stykla fabrikā izveiduota 20. godu symta 70. godu suokuos, i taišni Ludmila bejuse pyrmuo fabrikys stykla muokslineica. Komplekts sastuov nu sešom dažaida tylpuma gluozem – 500 ml, 170 ml, 125 ml, 80 ml, 45 ml i 20 ml. Autore stuostejuse, ka ideja, kai gluozem juoizaver, atrosta dobā. Tom izvālāta bucveideiga forma, kas jau seņ ir īrosta i lītuota, tok nūsaukums izdūmuots, dūmojūt par golda kulturu i diplomatejis muokslu. Iz gluozis pokala vīns ūtram preteimā īgravāti div naleli apli. Tī simbolizej div personys, kurys diplomatiski komunicej vīna ar ūtru. Turūt gluozi taišni iz itūs graviejumu, tei naizsleid nu pierstu i napamat nūspīdumus.

Trauku komplekts “Austrumi”

Kartenis autore: Amanda Anusāne/portals lakuga.lv

Ituo komplekta autore ir Aīda Rotčenkova, i tys radeits 20. godu symta 80. godūs. Tys ir cīši smolks čaja komplekts, boguoteigai dekorāts ar zaltu. Izaruod, ka tys bejs specials pasyutejums iz Kuveitu, kur dzer cīši stypru i soldonu čaju. Kai stuosta muzejā, Kuveitā komplekts izmontuots kai tik vīnu reizi lītojams – piec čaja dzeršonys trauki sasysti. Deļkuo tai? Taida asūt jūs tradiceja, kurai ar laimi, kū pi myusu īrosts pīsaukt, kod pleist trauki, naasūt nikaida sakara. Tys ari asūt dūmuots Kuveitys augstuokajom amatpersonom vaļsts svātku reizem, na kasdīnys lītuošonai.

Breiveibys pīminekļa flizis

Kartenis autore: Amanda Anusāne/portals lakuga.lv

Izaruod, ka Breiveibys pīminekļam pa vydu izvītuotys taišni Leivuona stykla fabrikā taiseitys flizis. Ari tuos var apsavērt Leivuona stykla muzeja ekspozicejā, kur stuosta, ka itaidys flizis pi jūs taiseitys pat divejis reizis. Pyrmūreiz tys nūtics pīminekļa restauracejis laikā 20. godu symta 80. godūs, kod Reigys Vagonu ryupneicā sataiseita flizis forma i piec tam Leivuonā tamā salīts styklys eipašā kruosā, kaidā nikuo cyta pi jūs nataiseja. Formys beja vajadzeigys, lai stykla izstruoduojumus varātu saražuot masveidā. Kūpumā tūlaik saražuots ap 200 bloku.

Ūtrū reizi ituos flizis taiseitys 21. godu symta suokuos, kod otkon nūtyka Breiveibys pīminekļa restauraceja. Reigā īprīškejuo forma vaira nabeja sasaglobuojuse, partū itūreiz Leivuonā taiseita ari poša forma. Tūreiz sataiseits ap 70 bloku.

Galerejā Leivuona stykla muzeja ekspoziceja. Foto autore: Amanda Anusāne/portals lakuga.lv

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]