Rokstu sagataveja: portals lakuga.lv

Ar sovim kulturys īsacejumim itūnedeļ doluos Kruoslovys nūvoda Dagdys Turysma punkta vadeituoja Sintija Maļkeviča. Jei aicynoj kūpā ar vysu saimi skaiteit latgaliski, īt dobā i gasteit Dagdys apleicīnis šmukuokajuos vītuos.

Saimis vokori “Losom latgaliski”

Dagdys Kulturys centra Facebook lopā ITE skaņ vokora puorsokys bārnim latgalīšu volūdā “Losom latgaliski!”. Nu 14. oktobra da 14. novembra kotru pyrmūdīni i catūrtdīni 20 stuņdēs ir breineiga vareiba sevkuram sovā saimis lūkā nūsaklauseit Egitys Kancānis saraksteituos 10 puorsokys latgalīšu volūdā. Piec puorsoku nūsaklausiešonys, bārni teik aicynuoti izzeimuot iz lopys puorsaceņā dzierdātū, nūfotografēt i davīnuot komentarā zam video.

Īt pastaigā i dazynoj kuo jauna

Jaundūmis muižys vidis izgleiteibys centrā var apsavērt soldiudiņa zivu mulažu kolekceju, īpasazeit ar iudiņa putynu daudzveideibu Latgolā i pasavērt cytus eksponatus, kas saisteiti ar mokšoruošonu i medeibu lūmu cylvāka dzeivē. Īprīšk dasokūt, var nūbaudeit saimineiču sataiseitūs gordūs iedīņus.

Taipat sevkurā laikā var nūīt muižys teritorejā sataiseitū dobys stygu, kura ir interesanta vysu godu, tī var apsavērt muižys laiku viesturis līceibys i solom bogotū Ežezeru aba Eša azaru.

Sovpus muzejā “Andrupenes lauku sēta” sasateik tradicejis, amatnīceiba, kulinarais montuojums, folklora i doba. Apmeklejūt muzeju gida pavadeibā, tiksit Latgolys laukūs 20. godu symta suokuos. Īprīšk dasokūt, ite var baudeit regionam rakstureigūs Latgolys kulinaruo montuojuma iedīņus, cīši īsoku ari pagaršuot Ondrupinis maizi. Taipat var izstaiguot 800 metru garu pūra stygu ar reibynojūšu vaivieršņu smuordu, sorkonūs dzērviņu kluojīni i skaneigim putynu bolsim.

Mozuo tradiceju škola par Muorteņa dīnu Ondrupinis lauku sātā

Pyrmaškolys i suokumškolys vacuma bārnim 10. novembrī ir vareiba pīdzeivuot Ondrupinis lauku sātys tradiceju školu. Tradiceju škola ir saimis kūpā byušona ar tematiskom aktivitatem par godalaikim i svātku svieteišonu pyrmaškolys i suokumškolys vacuma bārnim i jūs vacuokim. Sasatikšonys ir vīnu reizi mienesī, tematiski sasaistūt ar aktualajim svātkim voi dorbim tradicionalajā lauku sātā. Ir kūpeiga muziciešona, rūtalis i kaitu (spēļu) vuiceišonuos.