Tiks atkluota akvarelistei Elgai Paurai veļteituo monografeja
Rokstu sagataveja: portals lakuga.lv
Catūrtdiņ, 15. decembrī, trejuos stuņdēs piec pušdīņu Rēzeknis Muokslys i dizaina vydsškolys boltajā zālē byus monografejis “Elga Paura Latvijas glezniecībā” atdareišonys svātki, kurūs kluotyn byus ari poša gruomotys golvonuo varūne – izcyluo akvareliste Elga Paura, portalu informej vydsškolys puorstuovs Māris Igavens.
Monografeja tapuse godu garā periodā i tuos autore ir muokslys zynuotneica Irēna Vilčuka, kura padarejuse lelu pietnīcyskū dorbu, apkūpojūt muokslineicys dzeivi i dailradi. Gruomotā vydā ir ari 80 Elgys Paurys akvareli. Jaunuo monografeja turpynuos muokslys zynuotneicys īprīšk padareitū, viestejūt par Latgolys muokslinīku dzeivi i dorbim ar izdavumim par Francisku Varslavānu, Arvīdu Egli i Vitāliju Kalvānu.
Elga Paura (1952) ir vīna nu vodūšūs Latvejis akvarelistu. Jai ir sova eipašyuo daīšona akvareļgleznīceibai, kurā jei struodoj i izkūp jau garus godus. Sovys zynuošonys i prasmis jei nūdūd tuoļuok ari jaunajim muokslinīkim, Latvejis Muokslys akademejis studentim.
“Sovureiz ideja rūnās dobā – kaida faktura, atspeidums paļtī, vaca sīna, naīrosts akmiņs – tūs izmontoju kompozicejā kai fonu, kai detaļu, kai akcentu. Vysod gribiejīs vīnkuoršom lītom – prīškmatim, ānom, kruosu salykumim, pučem voi muokulim – īdūt svareigumu, izceļt tūs naatkuortojameibu,” tai par sovim dorbim soka poša muokslineica.
Par Pauru gleznuotuojs Osvalds Zvejsaļnīks ir sacejs: “20. godu symta 70. godūs Latvejā populars i pīraseits tyka akvareļs. Tūlaik Latvejis Muokslinīku savīneibys Latgolys organizacejā dorbuojuos izcyla akvarelistu trejūtne – vacmeistars Juoņs Unda i juo audziekni Elga i Vladislavs Pauri, sekojūt Varslavāna, Eglis, Kalvāna i cytu īdybynuotajom sovpateigajom Latgolys gleznīceibys tradicejom. Elga jūs vydā izacēle ar sovpateigu dobys uztveri, izkūptu, pat izsmolcynuotu koloritu i perfektu akvareļtehnikys puorvaļdeišonu.”
Monografeju izdavuse Rēzeknis Muokslys i dizaina vydsškola. Tuos izdūšonu atbaļstejuse Latgolys kulturys programa, kurū eistynoj Latgolys regiona atteisteibys agentura ar Vaļsts kulturkapitala fonda i A/S “Latvijas valsts meži” finansialu atbolstu, i Rēzeknis vaļstspiļsātys dūme.
