Rokstu sagataveja: portals lakuga.lv

Izguojs žurnala “A12” februara/marta numers i tymā var puorskaiteit sarunys ar muokslinīku Kristapu Ancānu, “Europe Direct Dienvidlatgalē” vadeituoju Oskaru Zugicki, prīsteri Stanislavu Prikuli, Daci i Imantu Losānim par modernū muolu nu “Pīterkolna” i cytim.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce soka: “Jaunais gods ir eistyn īsaskriejs! Tikū vēļ vielejom laimi, nu niu jau jaunvars garum i Svacaine viestej, ka zam snīga pukst snīdziņu lapenis. Ituo gods pyrmuo numera vadmotivs ir variešona i struoduošona. Mums ir daudzi dūts, nu nikas nav pasūleits, deļtuo bez dorba i cylvākmīlesteibys dūtuos vareibys palīk naizmontuotys.”

Žurnala “A12” februara/marta numerī skaitit:

• muola kukšyns i meilys skrūzeitis ar cylvāka sejis vaibstim – Dacis i Imanta Losānu stuosts par atsagrīžsonu Latgolā, Pīterkolnā;
• kaidys vierteibys itūšaļt svareigys sabīdreibai – centra “Europe Direct Dienvidlatgale” vadeituoja Oskara Zugicka (Zuģicka) redzīņs;
• kai jaunīts nu Preiļu nūvoda spiej īkaruot storptautyskus mārūgus – muokslinīka Kristapa Ancāna ceļš iz sasnāgumim Londonā, Ņujorkā i cytur;
• kai sekuot sovys dzeivis ceļa zvaigznei i kai pīdzeivuot atdareitus dabasus – pravesta, Atzineibys krysta kavalera Stanislava Prikuļa spāka vuordi;
• Indeja latgalītis Laurys Jurčys acim – atkluojumi, puorsteigumi, emocejis;
• kai ari cyti stuosti – par muolu, Aglyunys staceju i īsavieršona Latgolys jaunajuos muzeju izstuodēs.

Kai īrosts žurnalā “A12” puorskaitoma ari portala lakuga.lv sagataveituo informaceja par jaunumim latgaliskūs gruomotu laukā, kai ari vysu rokstu vydā ari portala lakuga.lv redakcejis taiseitī stuosti – ar myusu pošu kolegi, raidejuma “Pīci breinumi” producenti, pīna goldu stuostu atluojieju platformā Instagram Amandu Anusāni i tehnologeju zynuotuoju Kristapu Skuteli sasarunuoja lakuga.lv redaktore Laura Melne.

Žurnals “A12” ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Kab atbaļsteitu žurnala byušonu ari iz prīšku, aicynojam abonēt tū 2023. godam (itūgod izīs vēļ treis numeri). Jaunuokū žurnala numeri var nūpierkt (kai digitalā, tai taustomā veidā) ite: a12.lv.