Rokstu sagataveja: portals lakuga.lv

Sastdiņ, 6. majā, 19 stuņdēs Rēzeknē atkluos jaunu kulturvītu ar nūsaukumu “Rancāna pogolms”. Tuos izveidē apsavīnuojuši sūpluok asūšūs sasatikšonys vītu saiminīki – “Ausmeņa kebabs” saiminīks Valters Murāns i “KUUP coffee” saiminīks Oskars Maculevičs.

Kai viestej pasuokuma Facebook nūtikšonys aproksts, ka pārkiuņs vēļ nav bejs, tod iz zems sēdēt navar, tok terasē vys jau var. “Rancāna pogolms” atsarūn Nikodema Rancāna īlā 41, i 6. majā 19 stuņdēs vysi interesenti teik gaideiti iz atkluošonys svātkim.

Aicynojūt gostūs, “Ausmeņa kebabs” saiminīks Valters Murāns soka: “Pasuokumā varēs dzierdēt, kaidys zīpis mes sovā dorba pīredzē asam savuorejuši i kai nu tūs tykuši uorā. “Rancāna Pogolms” ir “Ausmenis” i “KUUP” kūpejuo terase, kur mes vysys vosorys garumā reikuosim vysaidus pasuokumus, koncertus, kinys, humora i spēļu vokorus,” tai Valters.

Sovpus “KUUP coffee” saiminīks Oskars Maculevičs dasoka: “Terase mums jau beja, tok gribiejuos tai īdūt rakstureņu, deļtam terase tiks papyldynuota ar foršom nūtikšonom vysys vosorys garumā. Raudzeisim papyldynuot Rēzeknis piļsātys kulturys dzeivi ar taidom nūtikšonom, kaidu, kai mums ruodejuos, da šam pītryuka. Mes, “Ausmeņa” i “KUUP”, asam sūpluok i papyldynojam vīns ūtru, vosora sūluos byut dyžan kruosaina!”

Vokora dalinīki: Kristīne Pāže i Didzis Bordo (grupa “Kautkaili”), muzykaluo apvienība “Švamme”. Pa vydu muzykalom aktivitatem byus ari foršys sarunys eipašā “Zīpu” izguojīnī, kur varēs vaira īpazeit obeju īsaisteitūs ādynuošonys uzjāmumu stuostus par vysaiduokom “zīpem” i kai nu tūs tikt uorā, taipat Valteram i Oskaram pīsavīnuos šefpovuors Haralds Saušs i latgalīšu kulturys kusteibys “Volūda” vadeituoja Edeite Husare. Vokoru vadeis Rēzeknis Tautys teatra akters Juoņs Pampe.