Rokstu sagataveja: portals lakuga.lv

Ludzys nūvodam izstruoduota jauna vizualuo identitate i izdūmuots sauklis “Te vyss ir pa eistam”, kas ir pyrmais nūvoda sauklis latgalīšu volūdā vysā Latvejā, informej pošvaļdeibys puorstuovi. Ideja par nūvoda logo, saukļa i vīnuotys vizualuos identitatis izstruodi bejuse jau seņ, tok beidzūt realizāta.

Ludzys nūvoda pošvaļdeibys dūmis prīšksādātuojs Edgars Mekšs stuosta: “Ludzys nūvods ir eipašs sovā vīnkuoršeibā, tū par sovu sātu sauc eisti i sirsneigi tuo dzeivuotuoji. Rodūt jaunu nūvoda zeimynu gribim, kab tei ir myusu apsavīnuošonys i atpazeistameibys zeime, kab tū īmīļoj na viņ vītejī dzeivuotuoji, tok kab tys kolpoj par īdviesmi braukt gostūs iz myusu nūvodu. Itys golamierkis vīnnūzeimeigai spēs puorsteigt pat pīredziejušu ceļuotuoju!”

Jaunais nūvoda logo radeits, īsadvasmojūt nu Ludzys nūvoda gierbūņa grafiskūs detaļu, nu seneju laiku kūptu vierteibu i tradiceju. Simbola centrs atainoj dzeivuotuoju sirsneibu, dzeivis dzierksti i vitalitati. Simbola spaitu vierzeiba iz centru attāloj kūpeigys vierteibys i saknis – vitalitatis olūtu, bet spaitu vierzeiba nu centra – spieju īdvasmuot i daleitīs.

Sovpus par nūvoda saukli izlaseita frāze “Te vyss ir pa eistam”. Tuo skaidruojums: Ludzys nūvods pīsaista ar sovu pamateigumu, tei ir vīta, kur vyss ir eists! Ite ir Latvejis senejuokuo piļsāta Ludza, tuoļuokais Latvejis austrumu punkts — Zylupe, i Kuorsovā runoj skaidrā latgalīšu volūdā. Tei ir pošpīteikama i pylnvierteiga vīta Latgolā, pīrūbežā, kas apvīnoj patīsu latgaliskumu, inovativu saimnīkuošonu i saticeigu dzeivuošonu.

Jaunū Ludzys nūvoda zeimyna strategeju i identitati izstruoduoja vizualuos komunikacejis i zeimynu agentura “BrandBox” – Latvejis uzjāmums ar 19 godu pīredzi zeimynu, īpakuojumu i digitalūs rysynuojumu izstruodē. Jaunuos nūvoda identitatis izstruodis procesā tyka īsaisteiti nūvoda dzeivuotuoji, dūmis deputati i pošvaļdeibys specialisti, organizātys intervejis, fokusgrupys diskuseja, 2022. gods vosorā tyka veikta dzeivuotuoju aptauja.

Zeimyna īvīsšona nūtiks pakuopeniskai, jau dreizumā jaunais rysynuojums pasaruodeis pošvaļdeibys i tuos īstuožu komunikacejis materialūs. Ar Ludzys nūvoda grafiskuos identitatis vodlinejom var īpasazeit tuo sātyslopā ITE.