Folklorys kūpa “Upīte” radejuse jaunys versejis divejom Juoņa dīnys dzīsmem
Rokstu sagataveja: portals lakuga.lv
“Rūtoj saule” i “Juonīts guoja” ir divejis dzīsmis, ar kuru jaunom aranžejom i videoklipim Bolvu nūvoda folklorys kūpa “Upīte” itūgod sveic vosorys saulgrīžūs i sagaida Juoņa dīnu.
Obejis dzīsmis – “Rūtoj saule” i “Juonīts guoja” – ir nu 1972. godā īraksteituos lentis, kurā nūvodpietnīks, literats i sabīdryskais darbinīks Ontons Slišāns īraksteja sovu muoti – teicieju Annu Slišāni. Niu juos mozmozbārni – Kate i Domeniks Slišāni, folklorys kūpys “Upīte” daleibnīki –, dzīsmem radejuši sovys aranžejis i myusu dīnu versejis.
Dzīšmu īroksti i klipi radeiti tīpat iz vītys Upeitē. Dzīsmis īraksteitys i apstruoduotys “Bigmaar’s Records” studejā pi Māra Keiša. Videoklipu dzīsmei “Rūtoj saule” taiseja Kate Slišāne, tymā golvonajā lūmā Viktorija Supe i bārnu folklorys kūpa “Upīte”, bet “Juonīts guoja” video muokslinīks ir Mikelis Slišāns, pi montažys struoduoja Kate Slišāne.
Dzīsmis “Rūtoj saule” video ite:
Dzīsmis “Juonīts guoja” video ite:
Folklorys kūpys vadeituojs i namaterialuos kulturys montuojuma centra “Upīte” direktors Andris Slišāns soka: “Maņ prīca, ka folkloras kūpai “Upīte” saīt izceļt zynamuokas i mozuok zynamas dzīsmes nu ituos apleicīnes pyura, tuopat prīca, ka ari myusu dzymtas dzīsmes daboj jaunu skaniejumu i rodūšumu ari cytuodā formatā. Ar dzīsmem sveicynojam svātkūs i vielejam kotram atrast sovu papardes zīdu!”
Kai jau īrosts Juoņa dīnys laikā namaterialuos kulturys montuojuma centrs “Upīte” ari itūgod aicynoj iz svātku īleiguošonu i festivalu “π-dzīdam”. Īleiguošona catūtdiņ, 22. junī, suoksīs 15.00 stuņdēs pi Upeitis školys ar leluokuo vaiņuka peišonu, bet 20.00 stuņdēs iz spēlem, rūtaļom i daņčim Ontona Slišāna duorzā aicynoj folklorys kūpa “Upīte” i jūs draugi. Piečuok vokorā nu 22.00 stuņžu Upeitis stadionā suoksīs festivals “π-dzīdam”, kurā itūgod uzastuos Katrīna Karele i Liene Skrebinska, grupys “Unknown Artist”, “Kei-Rei”, “Krēsla”, “Amber Sea”, projekts “Naktenīks i Reiti”, folklorys kūpa “Upīte”, kai ari eipašī gosti – grupa “Mars” nu Francejis. Pīsadaleišona īleiguošonā ir bezmoksys, bet festivala “π-dzīdam” beleti īprīškpuordūšonā berzrindas.lv nūpārkami pa 4,99 €, bet iz vītys moksuos 9,99 €.
