Rokstu sagataveja: portals lakuga.lv

Itūnedeļ kulturys īsacejumus sagatavejuši Latgolys Centraluos bibliotekys puorstuovi, kurī aicynoj atbraukt iz Daugovpili. Te nūtikšonys, kas atbylst jūs gaumei, var atrast kotrys. Latgaliskuos kulturys cīneituojim catūrtdiņ juoīt iz konferenci par Latgolys gruomatnīceibu, zynuotnis entuziasti vys jau ar napacīteibu gaida Zynuotnīku nakti pīktdiņ, sporta leidza jutiejim itys ir volejbola nedeļgols, tok muokslys baudeituojim – vareiba īpasazeit ar jaunū Rotko muzeja kruojuma izstuodi.

Konference par Latgolys gruomatnīceibu

28. septembrī Daugovpilī nūtiks regionaluo konference “Latgales grāmatnieku un literātu devums Latvijas grāmatniecībā”, kas ir daļa nu projekta “Ceļā uz “Latviešu grāmatai 500″ Latvijas reģionos: izdevējdarbība un tekstu izplatība senāk un tagad”. Konferencē paradzāti prīšklasejumi par gruomatnīceibys atteisteibu Latgolā 19. i 20. godu symtā. Vaira par pasuokumu var skaiteit ITE.

Rotko muzeja kruojuma izstuode

Pīktdiņ, 29. septembrī, 16.00 stuņdēs Daugovpiļs Marka Rotko muokslys centrā, iz prīšku – Rotko muzejā, sūpluok muokslinīka Marka Rotko originalu ekspozicejai tiks atkluota kruojuma izstuode “Nr. 2 [Bez nosaukuma]”. Jaunuo ekspoziceja ir aplīcynuojums Marka Rotko izcileibai i godu dasmytim nagaistūšajai ītekmei, jam turpynojūt īdvasmuot muokslinīkus vysaiduos paaudzēs daudzuos pasauļa vaļstīs.

Ceiņa par volejbola trofejom

Septembra pādejā dīnā Daugovpiļs Olimpiskajā centrā byus zynomi volejbola jaunuos sezonys pyrmūs trofeju eipašnīki – “Optibet” Superkausa 2023 īgivieji kai sīvīšu, tai veirīšu konkurencē. Sīvītem paguojušajā godā i Latvejis čempionatā, i Latvejis kausa izceiņā uzvarēja RVS/LU vīneiba. Tuos pretineicys tiks nūskaidruotys 26. septembrī spēlē storp VK “Jelgava” i RSU/MSG volejbolistem. Veirīšim ceiņā par kausu sasatiks paguojušuos sezonys čempioni “Ezerzeme”/DU i “RTU/Robežsardze/Jūrmala” komanda, kas paguojušajā godā izceineja Latvejis kausu.

Zynuotnīku nakts

29. septembrī nu 17.00 da 21.00 stuņdis Daugovpiļs Universitatē nūtiks Eiropys Zynuotnīku nakts pasuokumi, kurūs apmaklātuojim byus vareiba īpazeit vysys augstškolā puorstuovātuos zynuotņu nūzaris. Tī saistūšā veidā tiks skaidruoti zynuotnis sasnāgumi, ļaunūt sevkuram interesentam īsavērt zynuotnyskūs laboratoreju dorba nūslāpumūs.