Rokstu sagataveja: portals lakuga.lv

Jau trešū godu piec kuortys sevkuram, kurs sovus dorbus plānoj iz prīšku, ir vareiba tū dareit ari latgaliski. Ari itūšaļt plānuotuojs “Giut breidi” ir vīneigais taida veida izdavums latgaliski. Naseņ izsludynuota plānuotuoja īprīškpuordūšona. Vaicuojom tuo autorem, ar kaidom puormaiņom atīt 2024. gods plānuotuojs.

Pyrmū reizi latgaliskais plānuotuojs “Giut breidi” izguoja 2021. godā, tuo idejis autore namaineigi ir Līga Springa, grafiskuo dizainere ir Liāna Merņaka-Nikitina, kurom ar laiku pīsavīnuojuse foto autore i ari portala lakuga.lv žurnaliste, fotografe i socialūs teiklu redaktore Amanda Anusāne. Plānuotuoju pasyuteit var ITE.

Kai atkluoj “Giut breidi” idejis autore Līga Springa, ituo gods plānuotuojs jai ir eipašs, partū ka izdūts kai veļtejums juos suņu bārnam Haciko, kurs itūšaļt staigoj pa dabasu maleņu. “Ar ituo gods plānuotuoju es grybātu cylvākim likt aizadūmuot par draudzeibu i tū, ka ari draudzeibai ir laika īrūbežuojums kai sevkurai dīnai. Par tempu, i tū, ka mes reizem napamonam, cik dreiži paguojuse kuortejuo nedeļa. Es cīšyn aicynuotu “Giut breidi” lītuotuojus plānuot sovu laiku, tok nadamierst īplānuot ari byušonu ar sovim tyvajim, atrast laiku ari sev i raudzeit plānuot dorba dīnu tai, kab tei saītu piec vareibys produktivuoka,” stuosta Līga Springa.

Sovpus, kai stuosta vizualizaceju autore Liāna Merņaka-Nikitina, ari itūgod plānuotuoja dizainā turpynojās 50 tūņu palākuos nūkruosys. “Itūgod es drupeit vaira miksieju fontus aba burtveidūlus, kuri varbyut nu suoku izaver, ka nasaskaņ, tok patīseibā cīši labi vīns ūtru papyldynoj. Tys ari labi atsasauc iz myusu ideju i ituo gods temu par draudzeibu i tū, cik draudzeibys var byut dažaidys, tys atsaspīgeļoj ari plānuotuoja fotografejuos. Uzklausūt cylvāku idejis nu paguojušuo goda, mes itūgod īvīsem ari vertikalu sadaļu, kur ir laika dalejums nu septeņu reitā da deveņu stuņžu vokorā,” stuosta vizualizaceju autore Liāna Merņaka-Nikitina. Jei ari dasoka, ka “Giut breidi” nav standarta plānuotuojs, kaidi vairumā dabojami veikalu plauktūs, jo ituo plānuotuoja autoris kai dizaina, tai i saturiskū daļu izstruodoj cīšā sadarbeibā, puorrunojūt kotru detaļu, uzklausūt īsacejumus nu plānuotuoja lītuotuoju i raugūt tū padareit piec vareibys ārtuoku kotram, kurs grib sovu laiku plānuot latgaliski. “Vēļreiz raugūt pastreipuot tū, cik unikals i naatkuortuojams ir itys plānuotuojs, mes itūgod ari asam īvīsušys atseviškys kreituotys lopys pusis ar interesantim tekstim, tuos varbyut nav dyžanys puormainis, tok roda cytys sajiutys. Taipoš kai nūtikšonys myusu dzeivēs, taipat ari ituos kreituotuos lopys pasaruoda nasistematiski – cyta mieneša vydā, cyta beiguos i tamleidzeigi,” stuosta Liāna Merņaka-Nikitina.