Rokstu sagataveja: portals lakuga.lv

Ituos nedelis kulturys īsacejumus sagatavejuse Ludzys nūvoda Mežavydu pogosta bibliotekys vadeituoja i Nautrānu vydsškolys školuotuoja Inta Nagla. Jei roksta ari dzeju i itūgod debitēja “Rogovkys dzejis vogā”, sasaceņšūt ar cytim latgaliski rokstūšajim. “Kod vālais rudiņs pīsoka sevi ar boltom snīga puorslom i dīna jau sasaruovuse daudzi eisuoka, gribīs saīt kūpā, dzert čaju, īdegt svecis i pasadorbuot voi izzynuot kū interesantu. Beidzūtīs rudiņa dorbu skriejīņam, suocās mīra i puordūmu laiks, kod var kaidu atzinis gryudu giut nu cytu i dūt ari ūtram,” tai Inta.

Amaterteatru skeču paruode

Kotru godu pavasarī Ludzys nūvodā nūteik skeču paruode, kur vysi teatra mīļuotuoji var sasatikt, paruodeit sevi, a skateituoji – teik pi naatkuortojamys baudys. Itūreiz Blontu KN amaterteatris reikoj teatra draugu paruodi. Byus breineiga sasatikšona ar draugim! Smīkli i pozitivys emocejis nūdrūsynuotys. Paruode nūteik Blontu KN 4. novembrī 18.00. Pīsadaleis amaterteatri no Bolvu, Rēzeknis i Ludzys nūvodu. Braucit, ejit, apmeklejit – nanūžāluosit!

Keramikys darbneicys

Nautrānu sporta hallē – kulturys nomā ik pa laikam nūteik vysaidys rodūšuos darbneicys, kurys teik kupli apmaklātys na tik pīaugušūs, bet ari bārnu, pusaudžu i jaunīšu vydā. 1. i 2. novembrī vysi keramikys muokslys mīļuotuoji teik aicynuoti gataveit vieja zvonus nu muola. Interesanta īspieja izmieginuot sovus spākus muola veiduošonā. Rodūšū darbneicu vadeis Maija Gailuma. Nūdarbeibys paradzātys 18.00 stuņdēs.

Izcep buļbu blīnus!

Kotra sevi cīnūša saimineica rudinī koč reizi ir sacapuse buļbu blīnus i saimis lūkā capuši buļbys kažukūs, tys ir, ar vysu myzu lykuši gunkurā voi ari ceplī. Buļbu blīni ir taids latgaliskais iedīns, jī garšoj gondreiž vysim.

Buļbu bļīnu recepte nu munys kuknis:

• Sacerkoj voi blenderī samaļ buļbys;
• Dasyt 2-3 ūlys, atkareibā nu daudzuma;
• Dalīk suoli, garšvīlys, ari kaidu karūti cukra;
• Var dalikt ari kaidu samoltu seipulu, drusku kabača;
• Daber myltus;
• Dalej pīna, lai masai taida kriejuma konsistence;
• Līk iz ponnys i cap smuki zaltaini bryunus.
• Pasnādz ar kriejumu voi kriejuma – īvuoriejuma mērci
• Lobu apetitu! Lai labi garšoj!

Sveču līšonys darbneica

3. novembrī nu 13.00 da 16.00 stuņžu Bieržgaļa bibliotekā varit dūtīs iz sveču līšonys darbneicu, kū vadeis DeMa darbneicys vadeituoja Līna Skutāne. Tiks lītys sojis vaska svecis formuos i teitys bišu voska svecis. Materiali nūdrūsynuoti, nikas leidza nav juojem, vīneigi gribiešona dorbuotīs. Darynuosim “Svecis Latvejai”!