Rokstu sagataveja: portals lakuga.lv

Ar koncertim 2. novembrī Reigā i 4. novembrī Bierzpilī folklorys kūpa “Ceidari” īskandynuojuse Bierzpiļs dzīsmem i dzīduotuojim veļteitū albumu “Dzīduotumi, ļustātumi”. Pīduovojam foto atsavieršonu iz koncertu Reigā, Rakstnīceibys i muzykys muzejā.

Kai viesteits īprīšk, jau desmit godu Reigā dorbojās latgalīšu kulturys kusteibys “Volūda” folklorys kūpa “Ceidari”, kurā apsavīnuojuši dzīduotuoji nu vysaidu Latgolys vītu – Aulejis, Baļtinovys, Bierzpiļs, Leivuona, Rūžupis, Stabuļnīku, Škilbānu, Vileks i cytu. Ituo gods vosorā “Ceidari” īrakstejuši Bierzpiļs (voi kai tūlaik sauce – Domopolis) dzīduotuojim i dzīsmem veļteitu albumu “Dzīduotumi, ļustātumi”, kas ir kūpys pyrmais albums. Albumā skaņ desmit dzīšmu, kurys atrastys Latvīšu folklorys kruotivis digitalajā arhivā http://garamantas.lv publicātajūs materialūs i tuos sovulaik dzīduojuši Ciprians Pokrotnīks (pazeistams ari kai literats Augusts Egluojs), Anna Bundža, Bronislava Romanovska, Anna Stiernīks i Marta Šmidte.

Jaunū albumu, kas bezmoksys daīmams popularuokajuos muzykys straumiešonys platformuos (Spotify, iTunes, YouTube i cytur) i daīmams nūsaklauseišonai ari “Dolby Atmos” skaņu sistemā, “Ceidari” novembra suokumā īskandynuoja divejūs koncertūs Reigā, Rakstnīceibys i muzykys muzejā, i Bierzpilī, Bierzpiļs Saīta nomā.

Reigys koncertā, kū vadeja ari sovulaik “Ceidaru” dzīduotuojs, kinys “Piļsāta pi upis” golvonuos lūmys tāluotuojs, Dāvis Suharevskis, gostūs beja folklorys kūpa nu Daugmalis “Dāre”, Latvejis Universitatis deju folkloys kūpa “Dandari”, kai ari dzīsminīks Kārlis Kazāks. Ar vysim gostim “Ceidarus” saista “radnīceigys” (kūpeigi daleibnīki voi vadeituojs) voi draudzeigys i kūpeigys sadarbeibys saitis.

Ka Reigys koncertā “Ceidari” nūdzīduoja daļu nu jaunuo albuma i ari sev meilys dzīsmis nu cytu vītu repertuara, kai ari sadzīduoja kūpā ar Kārli Kazāku, sastdīnis koncertā Bierzpilī izskanēja vysys “Dzīduotumi, ļustātumi” dzīsmis. Gostūs Bierzpiļs Saīta nomā, kurā sasapuļcēja kai vītejī ļauds, tai “Ceidaru” daleibnīku rodi i draugi nu Bolvu nūvoda i cytu Latgolys vītu, beja Bierzpiļs folklorys kūpa “Saivenis”, kas nūdzīduoja vairuokys Bronislavys Romanovskys sovulaik dzīduotuos dzīsmis, vokaluo apvīneiba “Ūss”, kurys nūsaukums veļteits vītejai Ūsys apmetnei, kas atsarūn sābrūs Lozdukolna pogostā. Gostu vydā beja ari folklorys kūpa “Rūžupis veiri”, kuru vadeituojs ir “Ceidaru” daleibnīks Mairis Iesalnieks i pīsadola ari sovulaik “Ceidarūs” muzicejušais Juoņs Daugavietis.

Obejūs koncertūs beja vareiba apsavērt eipaši Bierzpiļs pusis dzīsmem i dzīduotuojim sataiseitū mobilū izstuodi, kurys mierkis beja paleidzēt izzynuot Bierzpiļs dzīduotuoju stuostus i nu jūs pīraksteitūs dzīšmu kruojumu. Albuma izdūšona padareita ar Latvīšu viesturiskūs zemu atteisteibys programys paleigu, bet koncertu nūtikšonu i izstuodis tapšonu pabaļstejs Vaļsts kulturkapitala fonds.

Fotogalerejā: “Ceidaru” koncerts “Dzīduotumi, ļustātumi” Reigā, Rakstnīceibys i muzykys muzejā. Foto Didzis Grodzs.