Latgalīši sabrauks Daugovpilī, kab īskandynuotu Zīmyssvātkus
Rokstu sagataveja: portals lakuga.lv
9. decembrī nu 10.00 da 18.00 stuņžu Daugovpilī, tierdznīceibys centrā “Ditton” (Cītūkšņa īlā 60) nūtiks Latgolys plānuošonys regiona (LPR) i Latgolys tematiskūs cīmu reikuotais tierdzeņš “Vasali Latgolā! Latgalīši sabrauc Daugovpilī!”, informej LPR puorstuove Zaiga Lāce.
Tierdzeņa laikā vysai saimei byus vareiba rodūšai dorbuotīs leidza i vērtīs Latgolys amatnīku meistarklasis pi pūdnīku Olgys i Valda Pauliņu, kūkamatnīka Juoņa Spuriņa (kūka kaitys i cyti kūka dorbi) i stykla muokslineicys Elvīrys Škutānis (stykla dekoru – mini vitražu izgataveišona), kurei itūgod LPR Latgolys uzjiemiejdarbeibys centra reikuotajā konkursā “Latgolys regiona uzjiemieju goda bolva” uzvarēja nominacejā “Goda amatnīks”.
Vysys dīnys garumā tierdznīceibys centrā “Ditton” skanēs latgalīšu muzyka i dejis ar kapelu “Augusti”, byus tradicionalī konkursi ar bolvom nu Latgolys amatnīku, latgalīšu volūdys dreizī kursi, sasadzīduošona i sirsneigys sarunys. Tiergā byus daīmami amatnīku darynuojumi i vītejūs ražuotuoju gordumi, latgalīšu gruomotys, muzykys īroksti, suveniri i vēļ daudz kas cyts. Taipat dorbuosīs latgalīšu vyrtuve ar gordom putrom i cytim lobumim nu gūdolguotuos “Goda lauksaiminīks” titula sajiemiejis – zemnīku saimisteibys “Kotiņi” pošu ražuotuos produkcejis. Vysys ļustis vadeis Oskars Bērziņš.
Itūgod jau nūtykuši vairuoki itaida veida pasuokumi Reigā – Breivdobys muzejā i Āgenskolna tiergā, tok itys byus pyrmais taida veida tierdzeņš tepat Latgolā.
