Rokstu sagataveja: portals lakuga.lv

Vīna nu pīredzis boguotuokūs latgalīšu sabīdryskūs organizaceju – Reigys latgalīšu bīdreiba “Trešō zvaigzne” – 27. janvarī ar Dekteru amaterteatra izruodi latgalīšu volūdā i savīseigu piecpušdīni svieteis 35 godu jubileju. Iz izruodi aicynuots sevkurs, kam interesej latgalīšu volūda i kultura, bet pasuokumā aicynuoti pīsadaleit asūšī i nazkodejī bīdreibys bīdri.

Ituo gods 27. janvarī Reigys latgalīšu bīdreiba “Trešō zvaigzne” svieteis 35 godu jubileju. Nu suoku 12.00 stuņdēs Bolūžu īlā 27, Puovula Jurjāna muzykys školā, sevkuram interesentam byus vareiba nūsavērt Dekteru amaterteatra izruodi “Onton, mums juosaškir!” latgalīšu volūdā. Kai aicynoj vīna nu bīdreibys puorstuovu volūdneica Lideja Leikuma: “Vītys školā daudz – da cylvāku 250 varūt saīt, ir zāle i balkons, i vyss tys sastdīnē byus deļ myusu vysu!”

Sovpus svātku turpynuojums gaidoms pasuocīņa ūtrajā daļā, kura nūtiks I. Kozakevičys Latvejis nacionalūs kulturys bīdreibu asociacejis sātā (Slūkys īlā 37) i suoksīs 15.00 stuņdēs. Tei paradzāta deļ bīdreibys bīdru i jūs tyvūs ļaužu.

Reigys latgalīšu bīdreiba “Trešō zvaigzne” ir dybynuota 1988. godā. Tei ir bīdreiba, kas apvīnoj latgalīšus, kuri kasdīnā nadzeivoj Latgolys regionā, tok patur gribiešonu uzturēt dzeivu i kūpt sovu volūdu i kulturu. “Trešajā zvaigznē” saknis rūnamys VEF Kulturys piļs ansambļam “Olūteņš”, kas ar sovom latgaliskajom dzīsmem prīcynoj klauseituojus vysaiduos nūtikšonuos Reigā. Gona leli ir ari bīdreibys nūpalni latgalīšu literaturys atteisteibā. Bīdreiba regulari organizej vysaiduokys kūpā saīšonys, taipoš aptyvai divejis reizis godā tei organizej kaidys leluokys nūtikšonys ar pīaicynuotim gostim.