Rokstu sagataveja: portals lakuga.lv

2023. godā Rēzeknis nūvoda Maltys pogosta apvīneibys puorvaļdis sešūs pogostūs (Feimaņu, Lūznovys, Maltys, Ūzulainis, Pušys i Sylmolys) tyka apkūpuotys vītejūs saimineicu receptis, kas 95 puslopuos ir apsaveramys e-gruomotā “Ar gordu muti [nazkod i niule]”. Izdavumā ir 85 receptis, kas īt nu 50 saimineicu kulinaruo pyura. E-gruomota radeita projektā “Seņču iedīņu tradicejis Maltys apvīneibys pogostūs” ar Latgolys kulturys programys i Maltys apvīneibys puorvaļdis finansialu atbolstu, viestej izdavuma sastateituoja Skaidreite Svikša.

E-gruomotys formats dūd vareibu tū vysu laiku papyldynuot, tok itūšaļt gruomotā ir četrys sadalis: “Gorduo klasika”, “Soldonī iedīni”, “Galis, duorzuoju i zyvu iedīni” i “Dzierīni”. Tok, kai stuosta gruomotys sastateituoja Skaidreite Svikška, tyka īsyuteits daudz cytu recepšu, kas vierzej iz īceri izdavumu papyldynuot ar saimineicu myusdīneiguotom i pošraideitom receptem. Itūšaļt gruomotu var apsavērt škārsteikla lopā ITE.

Skaidreite Svikška pastreipoj, ka izdavuma “rozineite” vysapyrma ir volūda, prūti, tei ir latgalīšu rokstu volūdā, snādzūt īguļdejumu na tik volūdys zynuošonu pylnveiduošonā, tok ari leksikys i iedīņu viesturiskūs nūsaukumu saglobuošonā. Par pīmāru, gruomotā var dazynuot par taidim iedīnim kai “Gorūznīki”, “Kukolkys”, “Kurkuleits”, “Stuļci”, “Ryuguļs ar spresnū”, “Kai by boguots” i cytim. Ūtrom kuortom, gruomotā ir davīnuoti ari dažu vuordu skaidruojumi, kuri laika gaitā ir radejuši sajukumus, pīmāram, klimpys i kļockys, voi ari smerdeleitis, kū kai garšvīlu līk ašņa dasuos, kas patīseibā ir sīvmātra, na majorans, kai plotai pījimts skaiteit. Taipoš ir apkūpuota vysaidūs olūtūs atrūnamuo informaceja par iedīņu nūsaukumu ciļmi, pīmāram, cepelini, vareniki, guļbišniki, zacerka, murcauka i cyti, taipoš ari pae dorba reikim, par pīmāru, ols bryuviešonys žeirs, strucs, īsaļneica i c. Treškuort, teksta uztveris atvīgluošonai izmontuoti latgalīšu folklorys materiali – sokomvuordi, parunys, tautysdzīsmis, anekdoti i pat daži buromvuordi.

E-gruomotys veiduotuoji ir Skaidreite Svikša i Edgars Blinovs, volūdys lītuos tolkā guojuse Maruta Latkovska, dizainu veiduojs Māris Justs, projektu vadeja Inga Čekša-Ratniece. Tok gruomotys autori izsoka lelu pateiceibu cylvākim, kuri paleidziejuši recepšu vuokšonā iz vītys pogostūs: Anitai Laizānei, Ernai Ulasei, Silvijai Pīguožnei, Inai Tučei, Līgai Ratnikai, Santai Ostašai. Taipoš ar sovom dzymtys receptem dalejuos: Dace Gaigala (babenis Annys Gaigalys, tāva krystamuotis Marijis Vulis i taņtis Genovefys Strodis receptis); Roberts Ružs (tāva Stanislava Ruža ols recepte), Līga Ratnika (babenis Valijis Liukis receptis) i Andris Zelenkovs (tāva Pītera Zelenkova recepte). Tok gruomotys saturu veidoj ari receptis, kas īt nu saimineicu Feimaņu, Maltys, Ūzulainis, Lūznovys, Sylmolys i Pušys pogostūs. Gruomotā īkļautī iedīni tyka degustāti i saimneicys gūdynuotys 23. februārī “Ūtrajā Čangaļu saītā ci olimpiadē”, kas nūtyka Ūzulainis tautys nomā.