Rokstu sagataveja: portals lakuga.lv

Folkmetala grupa nu Daugovpiļs “Varang Nord” publicējuse dzīsmi “Latgola”, kas ir jūs tūpūšuo albuma “Nuoves līsme” prīškviestness.

Dzīsmis “Latgola” muzykys i teksta autors ir Maksims Popovs. “Varang Nord” sevi sauc par grupu nu Latgolys soltūs mežu. Jī apvīnoj skorbūs death metala rifus ar episkom akordeona dzīsmem, rodūt unikalu zīmeļu poguonu/folk metala sajaukumu. Jūs dzīsmis slavej varonu kauju, ašņainu uperi vacajim dīvim i prīceigu zīmeļu mīlasti ar nabeidzamim ols žbanim.

Pārnejuo gods oktobrī “Varang Nord” izdeve ari mozalbumu (EP) “Veļi”, kurā īkļautys septenis grupys īprīškejūs albumūs izdūtūs dzīšmu akustiskys instrumentaluos versejis. Poši “Varang Nord” soka, ka itaidys dzīšmu versejis vēļ vaira paruoda grupys skaniejuma etniskū i tautys muzykys pusi.

Grupa “Varang Nord” dybynuota Daugovpilī i vysi grupys dalinīki īt nu Latgolys i dzīd latgaliski. Metalmuzykys grupa dorbojās jau nu 2014. gods, izdavuse ari albumus “Fire of the North” (2014), “Master of the Forest” (2015), “Call of Battle” (2017) i “Pārķiuņa uomurs” (2021), tok Latgolā zynomuoka palyka piec dzīsmis latgalīšu volūdā “Stuojīs” video palaisšonys škārsteiklā 2019. gods vosorā.