Vysleluokais “Īspaids” ir tod, kod tu juo nagaidi!

Vysleluokais “Īspaids” ir tod, kod tu juo nagaidi!

Rokstu sagataveja: Agnese Skangale

Nu 3. da 6. maja Daugovpilī nūtyka “2×2” seminars “Īspaids”, kurā ari maņ beja īspieja pīsadaleit. Tei beja pyrmuo taida tipa nūmetne piļsātvidē “2×2” pastuoviešonys viesturē. Seminarā pīsadaleja daleibnīki nu vysys Latvejis – kūpumā tī beja 25 jaunīši, nu kurūs 13 jaunīši beja nu Latgolys (Daugovpiļs, Rēzeknis, Preiļu i Ludzys piļsātu i nūvodu), tymā skaitā ari es.

Vīns nu “Īspaida” nūslāpumim beja nivīnam nazynamuo (izjamūt nūmetnis vadeituojus i organizatorus) i īspaideiguo programa, kura tyka turāta kluseibā leidz pat pošai tikšonai Latgolys Industrialuo tehnikuma dīnasta vīsneicai, kur “īspaidnīkim” beja atvālāta naktsvīta. Vīns nu ituo seminara naraksteitūs nūsacejumu beja – daleitīs ar sovim īspaidim par kaidu konkretu nūtikšonu/lekceju, kura beja īkļauta seminara programā.

Karteņā: Seminara “Īspaids” vadeituoji Lolita Čigāne i Nils Students. Foto: Līva Vernere

Seminars suocēs ar īpasazeišonu pi vakareņu golda, bet īspaideiguoku itū vokora gaitu padareja viests, kas daleibnīkim atguoja iz teleponim, ar viestiejumu, ka karadarbeibys deļ ir pasaslyktynuojuse sakaru darbeiba Leitovā. Ari maņ taida viests beja atguojuse, i tys drupeit mani nūšokēja, bet, duorgais skaiteituoj, nasasatrauc! Karadarbeiba natyka uzsuokta, i viests beja kai tests mums, jaunīšim, voi spiejam atpazeit patīsu informaceju nu dezinformacejis, i kū mes kai jaunīši varātu dareit/paleidzēt taidā situacejā. Piečuok ari pasadalejom ar sovim īspaidim par sajimtū dezinformacejis ziņu. Piec jaunīšu stuosteituo, variejom nūprast, ka vysi asam cīši leli Latvejis patrioti i par sovu zemi ceineisimēs!

Karteņā: “2×2” seminara “Īspaids” daleibnīki pi īpasazeišonys vakareņu golda. Foto: Līva Vernere

Piečuok, jau piec vakareņu, kūpā ar seminara vadeituojim, dzīšmuotā sulī guojom iz Latgolys Industrialū tehnikumu, kur myus sagaideja nalela nūdarbeiba. Tai kai vīns nu seminara vadeituoju – Nils Students – struodoj Zemissardzis bataļjonā, jis ar sovu kolegi Ēriku vaira pastuosteja ap i par Zemissardzi i tuos praseibom. Piečuok ari paruodeja i īvuiceja vysaidus “knifeņus”, kas varātu mums nūderēt na tik uorkuortys situacejuos, bet ari kasdīnā. Tyka ari izspālāta militaruo kaita (simulaceja) – X stuņde piļsātvidē, kod pa dažaidom grupeņom raudzejom dabuot breiveibā kīlnīku nu naidinīka giusta i ūtraižuok – kod bejom naidinīks i turiejom kīlnīku giustā.

Karteņā: “2×2” seminara “Īspaids” daleibnīki nūdarbeibā “X stuņde piļsātvidē”. Foto: Līva Vernere

Kotru vokoru piec vysu nūdarbeibu i lekceju sovu breivū laiku mes pavadejom, īpazeistūt cyts cytu caur sarunom i dzīsmem aba “neikšonā”, kai tū sauce seminara vadeituoji.

Vīna nu seminara tradiceju ir kotru reitu paceļt Latvejas karūgu himnys pavadejumā, bet vokorā tū nūlaist, dzīžūt dzīsmi: “Kalnā kāpu lūkotiesi, kas ar manu tēvu zemi.”

Ūtruo seminara dīna beja 4. majs, kas Latvejis viesturē ir nūzeimeigs datums, i tys ari beja vīns nu īmesļu, deļkuo itamuos dīnuos Daugovpilī nūtyka “Īspaids”. Ari mums, īspaidnīkim, taipat kai puorejim Latvejis dzeivuotuojim, beja sovi boltuo goldauta svātki Daugovpiļs centrā. Pi golda tyka na tik baudeiti gordi iedīni, bet ari uzklauseiti treis interesanti Latgolys jaunīšu stuosti, kū pīduovuoja Artjoms Uršuļskis, Beata Lavrinoviča i Jorens Dobkevičs, kuri ir spieceigi pīruodejuši sevi vysys Latvejis kontekstā. Kab pušdīnis itymā viesturiskajā datumā padareitu vēļ ļusteiguokys i patriotiskuokys, doncuojom daņčus ar folklorys kūpu “Speiga”. Tuoļuok ari sekuoja sarunys ar Vaļsts Rūbežsardzis puorstuovi Māri Pukinski par rūbežsardzis kasdīnu, struodojūt Boltkrīvejis pīrūbežā, i pietnīcyskuos žurnalistikys centra “Re:Baltica” puorstuovi Sanitu Jembergu, kura pasadaleja ar sovu Daugovpiļs pīredzi.

Karteņā: “Īspaidnīku” sarunys ar jaunīšim A. Uršuļski, B. Lavrinoviču i J. Dobkeviču. Foto: Līva Ververe

Lai “īspaidnīki” vaira īpazeitu piļsātu, daugovpilīte Anželika Litvinoviča beja sagatavejuse mums interesantu aizdavumu – īpazeit piļsātu caur dzeivuotuoju stuostim par meiluokajim atgadejumim, pīdzeivuojumim Daugovpilī. Nuokušajā dīnā kotrai grupeņai beja ari teatrali juoatruoda cylvāku stuosti. Lai 4. maju padareitu vēļ patriotiskuoku, kūpā ar seminara organizatorim guojom iz ASV Informacejis centru, kab vārtūs Viestura Kairiša kinu “Piļsāta pi upis”. Piec kinys nūsavieršonys sekuoja nalelys puorrunys ar Zemissardzis puorstuovi Annu Luīzi Ruskuli i akteri Māri Suseju, kuri pasadaleja sovā pīredzē par dzeivi Daugovpilī i tuos apleicīnē – kas ir puorsamejs itūs diveju godu laikā. Bet ar tū myusu patriotiskais vokors nasabeidze. Tuo izskaņā beja daņči ar muzikim Ēriku Zepu i Jurgi Lipski, kurim muzicēt pīsavīnuoja ari seminara daleibneicys.

Karteņā: “2×2” seminara “Īspaids” daleibnīki daņčūs ar Ē.Zepu i J.Lipski. Foto: Līva Ververe

Nuokušuo dīna, 5.majs, beja dīzgon intensiva i īspaidim boguota. Piec reitišku izspieļuojom Daugovpiļs dzeivuotuoju stuostus i tod jau bejom ceļā iz Daugovpiļs bārnunomu “Priedīte”. Kotrys jaunīts iz 2-3 stuņdem tyka par draugu kaidam bārnam i pavadeja kūpā laiku atpyutys parkā “Tarzāns”. Bet beja ari šaļts, kod mes pagaisynuojom sovu mozū draugu i atrodom jū spielejūtīs ar sovim vīnaudžim. Tuoļuok ari sekuoja daži medicīniskī paraugdemostriejumi nu Amerikys karaveiru Latvejā, kuri, cyta storpā, beja saryupējuši daleibnīkim pušdīnēs Amerikys armejis iedīni.

Karteņā: Amerikys karaveiru iedīņs, kū seminara daleibnīki pagataveja tīpat iz vītys atpyutys parkā “Tarzāns”. Foto: Līva Vernere

Vēļ vīna nu seminara tradiceju ir gataveit pošim sev vakarenis, i itei seminara reize nabeja izjāmums. Vyss beja tik gordai pagataveits, ka apēdem vysu leidz tukšim traukim. Piečuok pi vakareņu golda pasadalejom sovūs emocionalajūs īspaidūs piec kūpā pavadeita laika ar bārnim. Tei mums vysim beja emocionala šaļts, partū ka bez osoru acīs navariejom iztikt. Tymā vokorā ari tyka paruodeits naatkuortojams dezinformacejis pīmars, kū beja saryupiejuši seminara vadeituoji Lolita Čigāne i Nils Students. Video tyka paruodeits i pastuosteits, cik vīglai var kai samaituot cylvāka reputaceju ar napatīsu informaceju, tai ari tū, cik vīglai var apmuoneit cylvākus, kas dīvamžāļ nav izgleituoti voi naatšķir dezinformaceju nu patīsys informacejis. Īspaideiguokuo 5. maja nūtikšona beja nakts ekskurseja Daugovpiļs cītūksnī pi tuo saiminīku – plykspuorņu. Tai kai itys beja myusu pādejais kūpeigais vokors “2×2” seminarā “Īspaids”, tys tyka pavadeits, dzīžūt dzīsmis kai latvyski, tai latgaliski, taipat ari tyka padoncuots.

Karteņā: “2×2” seminara “Īspaids” daleibnīki Daugavpiļs cītūksnī gostūs pi plykspuorņu. Foto: Līva Vernere

Pādejuo seminara dīna beja vysai apsamuokuse, kas, saleidzynojūt ar puorejom korsti saulainajom dīnom, beja lels kontrasts. Apsamuokuši dabasi i leits vēļ vaira apbādynuoja seminara daleibnīkus i organizatorus. Vystik laikapstuokli naapstuodynuoja myus īt i izzynuot vaira par Daugovpili, tai īraugūt piļsātu vēļ nu cyta skotpunkta. Bejom vacuokajā skrūšu ryupneicā Zīmeļeiropā, kas atsarūn tepat Daugovpilī. Tī ari mes variejom i izsaut ar gaisini, i izkuopt skrūšu ryupneicys tūrnī, nu kura pasaver skots iz Daugovpili. Piečuok bejom ari Daugovpiļs cītūksnī, kur vaira izzynuojom par tuo viesturi. Apmekliejom vīnu nu cītūkšņa kuormu – vacū hospitali. Lai ari cyti vaira izzynuotu par myusu īspaidim seminarā, beja aizdavums nu seminara organizatoru nūfiļmēt video par sovim īspaidim seminara laikā. Turpynuojumā arī sekuoja atvodys i loba vieliejuma vuordi vysim seminara daleibnīkim i organizatorim.

Koč jau ari ir paguojs mieness piec “2×2” seminara “Īspaids”, vystik itei pīredze i īspaidi paliks atmiņā. Kas tū lai zyna – varbyut koč kod otkon vysi sasatiksim. Paļdis!

Karteņā: “2×2” seminara “Īspaids” daleibnīki ekskursejā pa Daugovpiļs cītūkšņa teritoreju. Foto: Agnese Skangale

Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]