Rokstu sagataveja: portals lakuga.lv

Latgolys Kulturviesturis muzejā, Rēzeknē, da 28. septembra apsaverama gleznuotuojis Gertrūdis Zeilis personalizstuode “Piederības formula”. 2019. godā muokslineica duovuoja muzejam 64 sovys gleznys, niu, svietejūt juos 80 godu jubileju, muzejs eksponej daļu nu gleznu kolekcejis, viestej Latgolys Kulturviesturis muzeja Muokslys nūdalis vadeituoja Inese Dundure.

Zeiļu saimē auga div meitys i obejis tyka par zynomom muokslineicom – vacuokuo meita Valentīna Zeile ir tieļneica i dzeivoj Parīzē (vaira par jū var izzynuot ITE), sovpus Gertrūde muokslā izalaseja gleznuotuojis ceļu. Muokslineica Gertrūde Zeile ir dzymuse Augšdaugovys nūvoda Naujinē. Tī ari itūšaļt atsarūn juos dzymtuo sāta, kur gleznuotuoja pavoda vosorys, turūt ryupi par bišu saimem i meklejūt īspaidus jaunom gleznom.

Muokslineicys Gertrūdis Zeilis myužs ir gona raibs – pyrmuo izgleiteiba sajimta niulejuo Augšdaugovys nūvoda Naujinis pamatškolā, sovpus piečuok celi vaduši iz Daugovpili, Rēzekni i Reigu. Sovpus dorba gaitys Gertrūde suokuse Reigys Lītiškuos muokslys vydsškolā, kur audzieknim vuicejuse gleznuošonu i zeimiešonu. Latgolys Kulturviesturis muzeja kruojumā atsarūn vaira nakai 20 itymā laika periodā radeitu muokslys dorbu, kuru tematika dzili sakņojās taišni Latgolā, tuos ļaudīs i tradicejuos.

Nuokušais muokslineicys dzeivis pūsms saisteits ar Jaņa Rozentāla Reigys Muokslys vydsškolu, kur Gertrūde dorbuojuos kai školys direktore (1978-1986). Koč ari kasdīnys dorbs školys vadeišonā nareši aizjēme ari vokora stuņdis, muokslineica vystik atroda laiku gleznuošonai. Itymā periodā gleznuotuojis dorbūs īīt tuolūs zemu motivi nu Indejis, Nepalys i Spānejis.

Gertrūdis Zeilis dorbu vydā dominej figuraluos kompozicejis i portreti, tematu lūkā vysubīžuok pasaruoda zeme, cylvāks i muoksla. Zeme kai pīdareiba dzymtajai Latgolai i pasauļa telpai kūpumā. Cylvāks kai sovejais i svešais, ar sovom tradicejom i dzeivis kuorteibu. Muoksla kai dūmuošonys veids, kas izsaceits kruosu laukumūs i ūtys rokstā, pauž autorei svareigū, pošys puordzeivuojumus i atkluosmis.

Kai roksta Latgolys Kulturviesturis muzeja Muokslys nūdalis vadeituoja Inese Dundure, Gertrūde Zeile sovūs gleznu motivūs izalosa pieški īraudzeitys lītys voi situacejis, kas puortūp filozofiskuos i dziļu jāgu ītvarūšuos kompozicejuos. Juos dorbus caurvyn sylts i cytreiz smagnejs kolorits. Goreigī mekliejumi, seve izzynuošona i atkluosmis vysleidza ir kluotyn asūši komponenti, cikom gaiseigumu i vīglumu audakli daboj, kod gleznuotuojis rūka valk vijeigys linejis i veidoj plastiskus laukumus. Cauri laikim jei ir gleznuojuse ari pošportretus, tai nateišom atkluojūt ari sovu tuos šaļts dvēselis stuovūkli i dzeivis nūtikšonu ītekmi.