Rokstu sagataveja: Laura Spundere, portals lakuga.lv

Pasasokūt treis aktivim Rēzeknis Tehnologeju akademejis absolventim – Armandam Ūzuleņam, Sandim Promam i Kasparam Ločmeļam –, ir izaveiduojuse aktivu cylvāku grupa, kurys mierkis ir izveiduot Latgolys studentu korporaceju. Sarunā ar Armandu, Sandi i Kasparu raudzeju dazynuot, kai taida ideja rodusēs i kaidi ir plani iz prīšku.

Vysi treis puiši ir absolvējuši Rēzeknis Tehnologeju akademeju (RTA) i niu vaira nastudej. Armands Ūzuleņš ir pabeidzs RTA bakalaura studeju programu “Tīseibu zynuotne”, Sandis Proms – bakalaura studeju programu “Uzjiemiejdarbeiba i marketings” i magistra programu “Vadeibys zynuotne”, sovpus Kaspars Ločmelis ir absolvējs bakalaura i magistra studeju programu “Tīseibu zynuotne” i niu ari losa atseviškys lekcejis jaunajim studentim. Interesanti, ka vysi treis puiši ir nu dažaidu Latgolys pušu – Armands īt nu Preiļu nūvoda Saunys pogosta, Sandis nu Augšdaugovys nūvoda Vyšku pogosta, sovpus Kaspars ir nu Rēzeknis nūvoda Veremu pogosta. Kaspars ar Armandu nazkod beja studeju bīdri, sovpus ar Sandi sasapazyna, aktivi īsasaistūt studejūšūs dzeivē i studejūšūs padūmēs.

Jau 2017. godā tyka nūdybynuota Latgolys studentu bīdreiba. Kai stuosta Armands, bīdreiba jau tūlaik sataiseita ar mierki iz prīšku veiduot studentu korporaceju, jis ari dasoka, ka studentu korporacejom vysubīžuok juridiskuo forma ir bīdreiba.

Armands stuosta, ka viesturiski studentu korporacejis pamatā bāzejušuos Reigā i Jelgovā. Jis skaidroj, ka studentu korporaceja ir myužizgleiteibys organizaceja, kas sevī apkūpoj studejūšūs i tūs, kas ir pabeiguši studejis. Veirīšu i sīvīšu studentu korporacejis dorbojās atseviški. Puiši skaidroj, ka korporacejis mierkis ir namiteiga izagleituošona, byušona kūpā i patriotisks gors.

Armands stuosta, ka Latgolys studentu korporaceja teiri tehniski atsarūn sovā dybynuošonys procesā. “Studentu korporacejom ir nūsacejumi, jom ir ari tai sauktuos “jumta organizacejis”, kas apvīnoj vysys korporacejis. Mums kai tūpūšai korporacejai ir juosavīnoj ar itom “jumta organizacejom”, kab mes varātu kūpeigi dzeivuot vysu korporaceju lūkā. Latvejā golvonuo korporaceju organizaceja ir Prezideju konvents, zam kuruo ir vairums Latvejis studentu korporaceju, vēļ ir Šaržātūs konvents, kurs tik naseņ ir atjaunuots. Zam Šaržātūs konventa ir vīnys nu Latvejā leluokūs korporaceju “Letonija” i “Talavija”. Kaidai nu asūšūs korporaceju ir juogolvoj par mums i juouzajam atbiļdeiba, ka mes īīmam tymā studentu korporaceju vydā,” stuosta Armands. Sovpus Kaspars papyldynoj, ka atbiļdeiguo korporaceja vuiceis Latgolys studentu korporacejai tai sauktū buršu aba studentu korporaceju bīdru goru. “Tī ir gona lela bagaža sovu īškejūs tradiceju, kas ir juozyna i juojam vārā,” stuosta Kaspars. Jau nu 2017. goda Latgolys studentu bīdreiba sasadorboj ar studentu korporaceju “Talavija”, kas ari byus Latgolys studentu korporacejis puorstuovi.  

Puiši pīzeist, ka, asūt regionā, korporacejis aktivai darbeibai ir daudz vaira izaicynuojumu nakai, pīmāram, Reigā. “Juopīzeist, ka Latgolā i Rēzeknē studenti nazyna par korporacejom i tryukst izpratnis par tom, deļtam grybātūs, ka ari te cylvāki īpazeitu tū drupeit atškireigū korporaceju pasauli,” stuosta Sandis. Sovpus Armands pīzeist, ka korporacejis modeļs izvālāts deļtam, ka vysim trejim ir tyvs patriotiskums, seve namiteiga atteisteiba i pylnveide, taipoš ari kūpeibys veiduošona.

“Vysys studentu korporacejis ir cīšyn Latveju i patriotismu atbolstūšys kai svātkūs, tai i kasdīnā, sovpus mums ir svareigi pastreipuot, ka asam par Latveju, tok ari par Latgolu,” darunoj Sandis.

Puiši stuosta, ka deļ īsaistis korporacejā napastuov vacuma īrūbežuojuma, deļtam sevkurs interesents drūsai var sasazynuot e-postā rtakorp@gmail.com, izsokūt gribiešonu īsasaisteit. Korporacejā plānuots uzjimt studentus i absolventus nu RTA i cytu Latgolys augstuokuos izgleiteibys īstuožu, taipoš ari studentus i absolventus nu sevkurys Latvejis augstuokuos izgleiteibys īstuodis, kurim ir tyvs Latgolys regions.

Taipoš puiši stuosta, ka korporaceju kasdīnā ir vysaiduoka veida nūtikšonys, tymā skaitā savīseigī vokori, literaruos nūtikšonys, vareiba īsavuiceit klasiskuos dejis, vysaiduoku kulturys pasuokumu apmekliešona, kas roda pīvīnuotū vierteibu. “Mums ir svareigi paruodeit, ka lekcejis i studejis nasastuov viņ nu vuiceišonuos, kas, prūtams, ir svareigi, tok studejūšūs dzeive var byut daudz boguotuoka i interesantuoka,” stuosta Kaspars.

“Mes labi atguodojom, cik forši beja studeju laiki, kod augstškolā tyka organizātys studentu ballis i cytys nūtikšonys, kod puļcejuos pylna zāle. Cikom niu nav īspiejams salaseit sauveiti cylvāku,” stuosta Armands. Sovpus Sandis dasoka, ka niu jau varātu pavaicuot, kod vyspuor ir bejuse pādejuo balle?

Puiši ari pastreipoj, ka cīši lelys korekcejis studentu dzeivēs ir īvīsuse pandemeja, kas aiz seve pamatuse cīši lelu nūspīdumu. “Cylvāks suoce vuiceitīs augstškolā, i divejus godus, kas ir puse nu vuiceibu, nav satics sovus kursabīdrus, tys palykušais gods voi diveji, kab sasapazeitu ir saleidzynūši mozs laika pūsmys,” stuosta Kaspars. Cikom Armands vēļ dasoka, ka taišni piec pandemejis studentu dzeive ir izteikti apseikuse, deļtam korporacejis izveide byutu vīns nu veidu, kai otkon atdzeivynuot eistynu i aktivu studeju vidi.