Rokstu sagataveja: portals lakuga.lv

Luočplieša dīnys prīškvokorā kapela ”Augusti” publiciejuse sovu pyrmū studejis īrokstu ar nūsaukumu ”Apkuort kolnu”, viesteits kapelys socialajūs teiklūs. Jaunais īroksts īzeimej kapelys dasmytuos sezonys darbeibu.

Kai interesentim stuosta kapela ”Augusti”, jaunuo dzīsme, kas ir latgalīšu tautysdzīsmis ”Apkuort kolnu” apdare, radeita par gūdu vactāvim i vacvactāvim. Kapelys ”Augusti” sastuovā itūšaļt muzicej: Māra Rudzāte, Marta Vanaga, Līva Geriņa, Matīss Lojāns i Oskars Bierzeņš (Bērziņš).

Kai portalam lakuga.lv stuosta kapelys ”Augusti” vadeituojs Oskars Bierzeņš, niu kapelai īsasuokuse dasmytuo darbeibys sezona i jau garu laiku dūmuots ap īrokstim. ”Niu beidzūt asam sasajāmuši pyrmū reizi izdūt studejis īrokstu. Par reizi var saceit, ka jis nūteikti nav pādejais, kam jau itūšaļt struodojam pi vēļ jaunys dzīsmis, kū ari cerejam vysā dreiži nūdūt klauseituojim,” stuosta Oskars, atzeistūt, ka dorbā īrokstu studejā pi dzīsmis ”Apkuort kolnu” aizguojs daudz laika, kotru reizi nūsaklausūt, gribiejīs daudz kū lobuot i uzlobuot, cikom jau tikts da gola varianta, kas kapelys dalinīkus pošus apmīrynuotu. ”Dzīsmi atrodom najauši, vaicojūt īdviesmi folklorys arhivūs. Dzīsme ”Apkuort kolnu” īt nu Zīmeļlatgolys i ir veļtejums vactāvim i vacvactāvim, kam beja svareiga lūma myusu dzeivēs, kab mes niu varātu byut breivā vaļstī, breivā zemē i dzīduot tāvu volūdā! Itymā svātku mienesī mes grybātu, kab kotrys nūvārtātu, cik daudz mums ir i cik daudz nūzeimoj breveiba. Saulis myužu Latvejai!” vielej kapelys vadeituojs.

Dzīsmis īroksts padareits sadarbeibā ar īrokstu studeju ”Jauda Music”, video autori ir Māra Rudzāte, Amanda Spūle i Oskars Bierzeņš, bet juo montažu taisejs Andris Mačāns.