Rokstu sagataveja: portals lakuga.lv

Portals lakuga.lv sadarbeibā ar Anželiku Litvinoviču i ReTV nūslādz projektu “Drūss, vēļ drūsuoks – kleidynojam mitus par aizsardzeibu”, kurā ar septenim eisim raidejumim kleidynuoti miti par aizsardzeibu. Video materiali ir publiski daīmami portala lakuga.lv i ReTV socialūs medeju platformuos, i tūs var izmontuot školuos i cytuos īstuodēs, kur vajag runuot par aizsardzeibys nūzarei aktualom temom.

Projekta golvonais mierkis ir apzynuot Latgolys dzeivuotuoju informieteibu par vaicuojumim, kas saisteiti ar aizsardzeibys nūzari. Taipoš ir daudz tikpat svareigu papyldu elementu – dezinformacejis apkaruošona, stereotipu lauzšona par sīvītis lūmu aizsardzeibys nūzarē, kai ari informacejis vuokšona par Latgolys dzeivuotuoju attīksmi pret vysaidim svareigim vaicuojumim. Eisūs raidejumu sereja “Drūss, vēļ drūsuoks – kleidynojam mitus par aizsardzeibu” pīduovoj īskotu vysaiduos temuos – Latvejis uorejuo drūseiba, austrumu rūbeža nūstyprynuošona, gataveiba i reiceiba krizis situacejuos, pretesteiba Krīvejis propagandai, vaļsts aizsardzeibys vuiceiba (VAM) školuos i cytūs svareigūs vaicuojumūs. Raidejumi ir apmāram pīcys minutys gari. Tī īkļautys īlu intervejis ar Latgolys dzeivuotuojim, tod sekoj interveja ar īriedni, ekspertu voi cytu ar temu saisteitu personu, kas kleidynoj mitus i snādz precizu informaceju par kaidu vaicuojumu. Raidejumus izmontuošonai školuos voi cytuos īstuodēs var vīgli atrast portala lakuga.lv YouTube profilā atskaņuošonys sarokstā “Drūss, vēļ drūsuoks – kleidynojam mitus par aizsardzeibu”. Vaira par pošu projektu ITE.

“Izpratnis veicynuošona par tik svareigu temu kai aizsardzeiba ir napuortraukts process, kam vysod juopalīk lobuokam. Ir juoatrūn jauni veidi, kai uzrunuot cylvākus saprūtamā i saistūšā veidā. Tys beja ari ituo projekta mierkis – pīduovuot cytaidu redzīni, kai komunicēt par vaļsts aizsardzeibu, drūseibu, geopolitiku i tt. Veidojūt scenareju eisūs raidejumu serejai, raudzeju sevi īsadūmuot skateituoja lūmā, kurū eipaši nainteresej īprīkš pīmynātī vaicuojumi. Taidā veidā mes radejom saturu, kas kūduleigi i interesanti stuosta par svareiguokajom lītom, aktualizejūt aizsardzeibys nūzaris tematus plašuokam cylvāku lūkam.

Īlu interveju apvīnuošona ar ekspertu voi amatpersonu intervejom izaruodeja loba kombinaceja – video palīk dinamiskuoki i aizraunūšuoki. Na mozuok svareigs faktors – īlu intervejis kolpuoja kai daļa nu īspieju izpietis, kab ekspertim aizdūtu Latgolys dzeivuotuojim interesejūšus vaicuojumus. Eipaši vierteiga pīredze, kas deve gondarejumu par padareitū i pozitivys atsauksmis nu skateituoju pusis. Septeņuos epizodēs apsavārtūs temu lūks ir plašs i ari kleidynoj vysizplateituokūs mitus. Tei ir projekta pīvīnuotuo vierteiba, partū ka ceiņa pret dezinformaceju ir ari vaļsts aizsardzeibys vaicuojums,” tai projekta iniciatore, producente i žurnaliste Anželika Litvinoviča.

Zamuok apsaverami vysi projektā sagataveitī video.

Projekts veiduots sadarbeibā ar Aizsardzeibys ministreju, nu projektu konkursa “Atbolsts Latgolys informativuos telpas styprynuošonai” 2024. godam leidzfinansiejuma. Projektu realizej latgalīšu kulturys ziņu portals lakuga.lv sadarbeibā ar ReTV, projekta iniciatore ir žurnaliste Anželika Litvinoviča.