Rokstu sagataveja: portals lakuga.lv

Straujim sūļim ir īsasuocs janvars. Goda suokums parosti ir laiks, kod vēļ tik īsaskrīnam lelajim dorbim i plānim, deļtuo ir vaira laika puordūmom, šaļtim ar saimi i pošim sev. Itūreiz ar kulturys īsacejumim nedeļai pasadola Dagdys kulturys centra vadeituoja Inese Plesņa. Jei īsoka nūtikšonys na tik Dagdys apleicīnē, tok aicynoj sevkuram nūbraukt i vaira īpazeit Kruoslovys nūvodu i tuo unikalūs objektus.

Tradiceju škola mozajim

Ondrupinis lauku sātā regulari saimem ar bārnim teik reikuota tradiceju škola. Tī pyrmsškolys i suokumškolys bārnim ir vareiba izzynuot par godskuortu svieteišonu i tradicionalū dzeivis veidu Latgolā. Ituo gods pyrmajai saīšonai ir ari sova tematika par zīmys dorbim suprātkuos.

Jaundūmis muižys dobys styga

Kai vītejī Kruoslovys nūvodā, tai ari turisti i interesenti ir aicynuoti apmeklēt Jaundūmis muižys teritoreju i dobys stygu, kurā var īpasazeit ar aizraunūšom muižys laiku viesturis līceibom i izbaudeit Latgolys dobys daudzveideibu. Jaundūmis dobys styga vad leidz Ješa azaram, kurs ir solom boguotuokais Baļtejā.

Pasaceit paļdis!

Kotru godu 11. janvarī vysā pasaulī teik atzeimāta Storptautyskuo “Paļdis” dīna, kuruos mierkis ir pīvērst viereibu pateiceibys nūzeimei cylvāku attīceibuos sovā vydā. Par gūdu pateiceibys svātkim 17. janvarī Dagdys vydsškolā tiks reikuots ari Pateiceibys dīnys koncerts, kurū var apmekleit sevkurs interesents.