Rokstu sagataveja: portals lakuga.lv

Paziņuoti datumi, kurūs tiks atkuortuota latvīšu hip-hopa i latgalīšu dzejis koncertizruode “Putāns. Toreiz un Tagad”. Iz skotivis kuops taidi muokslinīki kai Ūga, ansis, Gustavo i Juoņs Skutelis. 3. majā 20.00 stuņdēs pasuokums nūtiks Reigā, koncertzālē “Palladium”, bet 9. majā 19.00 stuņdēs Valmīrā, Valmīrys kulturys centrā, viestej pasuokuma organizatori.

Kai informej “Putāns. Toreiz un Tagad” producentu komanda, bolstūtīs iz skateituoju pozitivajom atsauksmem piec pyrmizruodis Latgolys viestnīceibā “Gors” paguojušuo gods beiguos, ir izlamts atkuortuot koncertizvadumu. Koncertizruodis režisors ir akters i komiks Juoņs Skutelis, kurs iz skotuvis kuops ari kai vadeituojs i teiciejs. Par gūdu poša režisora ​​latgaliskajom saknem skotivis tālam tyka izalaseits pseidonims Dekšuorīts (Dekšuoru pogosts atsarūn Rēzeknis nūvodā).

“Daļa “Putāns. Toreiz un Tagad” topa Reigā, daļa Rēzeknē, i pyrmū reizi ituos dalis sasatyka tik pyrmizruodis dīnā iz “Gora” skotivis. Lītojūt transplantacejis terminologeju, beja lela prīca i gondarejums, ka ituos atseviškuos dalis pījēme vīna ūtru i ļuove sasavīnuot, veidojūt vīnu vitalu i spieceigu vasalumu,” stuosta Juoņs Skutelis.

Koncertizruodis gosti varēs pīdzeivuot legendom apteituo i pret sistemu īmūšuo latgalīšu dzejnīka Seimaņa Putāna (1892-1969) dzejis laikmeteiguos interpretacejis kai originalajā latgalīšu volūdā, tai ari atdzejuojumus latvīšu literarajā volūdā, kurūs dzejūli ir pīlāguoti rečitativam iz hiphop bīta (muzykaluo pavadejuma). Putāna dzeja atjaunuota jaunā, spūdrā i provokativā skaniejumā, kurā paguotnis dumpeigais gors saplyust ar myusdīneigū. Kai pastreipoj koncerta organizatori, tei ir latgalīšu dzeja hiphopā i hiphops latgalīšu dzejā.

“Putāns. Toreiz un Tagad” rodūšuo vadeituoja ir latgalīšu repere i “Ausmeņa Records” puorstuove Ūga (Daiga Barkāne). Muzykalū pavadejumu veiduotuojs ir Nikita Grapps („Ausmeņa Records”). Prīšknasumu veiduošonā pīsadola vītejī hiphopa smogsvori – reperi ansis i Gustavo. Tymūs daaicynuoti ari vairuoki Latgolā īcīneiti jaunuos paaudzis muzykys muokslinīki, kurī dūd autentisku sajiutu i skaniejumu. Koncertizruodi producej Margers Zeitmanis kūpā ar Leigatnis rodūšuo kvartala “Zeit” komandu. Projekta veiduošonys iniciativa baļsteita producenta radnīceigajuos saknēs ar dzejnīku Seimani Putānu. Beletus iz koncertizruodi “Putāns. Toreiz un Tagad” Reigā i Valmīrā var nūpierkt ITE.

Projektā “Putāns. Toreiz un Tagad” tyka izdūta ari gruomota i vinila plate, vaira par aļbumu “Caur bolsim as eju” i dzejis kruojumu “Seimaņs Putāns. Kūpuotī roksti” var skaiteit ITE, tok gruomotu i plati var nūpierkt ITE.