Rokstu sagataveja: portals lakuga.lv

Dīvamžāļ 24. februarī apritēs jau treis godi, kai Krīveja ībruka Ukrainā i turpynoj napamatuotu i navajadzeigu kara darbeibu. Sevkuram Latvejis dzeivuotuojam juoatguodoj, ka Ukrainys uzvara byus ari Latvejis i vysys Eiropys uzvara, deļtuo, kab piec vareibys atbaļsteitu Ukrainu ceiņā par taisneibu, portals lakuga.lv ir apkūpuojs 24. februara atbolsta nūtikšonys vysā regionā.

Daugovpiļs

• 24. februarī nu 16 da 18 stuņžu nūtikšonu cykla Ukrainys atbolstam “Ukraina – Украïна” laikā Daugovpiļs Vīneibys noma laukumā byus muzykals pavadejums “Skani, Ukraina!”, kura laikā tiks atskaņuoti ukraiņu komponistu dorbi i ukraiņu tautys muzyka.
• 24. februarī 14 stuņdēs bīdreiba “Cita Daugavpils” aicynoj iz plakatu darbneicu. Plakatu veiduošonai vajadzeigī trafareti ar Ukrainys atbolsta simbolim, kruosom i papeirim tiks nūdrūsynuoti.
• 24. februarī 17.30 stuņdēs bīdreiba “Cita Daugavpils” organizēs guojīni Ukrainys atbolstam “Kopā līdz uzvarai”. Guojīņa maršruts – nu Stacejis īlys 44 (preteimā dzeļžaceļa stacejai) pa Reigys īlu da Vīneibys laukumam.
• 24. februarī 18.30 stuņdēs Daugovpiļs Vīneibys noma koncertzālē nūtiks lobdareibys koncerts “Veltījums Ukrainai”, kurū organizej Daugovpiļs vaļstspiļsātys īstuode Vīneibys noms sadarbeibā ar organizaceju Ziedot.lv. Koncertā pīsadaleis Vīneibys noma Latvīšu i latgalīšu kulturys centra kolektivi i Vīneibys noma Ukraiņu kulturys centra kolektivi, Daugovpiļs Universitatis deju kolektivs, solisti i akteri. Vysi koncerta dalinīki pasuokumā pīsadaleis breivpruoteigai. Koncerta laikā tiks vuokti zīduojumi Ukrainys atbolstam – byus vareiba zīduot skaidru naudu Ziedot.lv kasteitēs, taipoš ļauds aicynuoti zvaneit iz zīduojumu numeri 9000 6086 (moksa par zvonu 1,42 eiro). Koncerts nūteik pasuokumu cyklā Ukrainys atbolstam “Ukraina – Украïна”.
• Vēļ vīna nu pasuokumu cykla Ukrainys atbolstam “Ukraina – Украïна” aktivitatem ir informativa izstuode Vīneibys noma skotlūgūs “Ukrainas pilsētas fotogrāfijās…”. Tamā var īpasazeit ar Ukrainys leluokajom piļsātom.
• 24. februarī 19 stuņdēs bīdreibys “New East” telpuos (18. novembra 41a) pyrmū reizi Daugovpilī nūtiks bezmoksys dokumentaluos kinys “20 dienas Mariupolē” seanss, kurū organizej “New East Space” instituts. Filmā teik atainuota kara gaita pyrmajuos nedeļuos caur žurnalistu acim, kurī palyka aplanktajā Mariupolē. Kinu radejuši režisors i fotografs Mstislavs Černovs, fotografs Jevgenijs Maloletka, producente i žurnaliste Vasilisa Stepanenko. Jī beja pādejī žurnalisti, kurī dokumentēja Krīvejis izneiceibys suokumu Mariupolē. Aplankumā jī turpynuoja fiksēt kadrus, kas piečuok tyka par kara simbolim – mierstūši bārni, masu kopi, bombardātuo dzemdeibu nūdaļa i cyti na vīgli panasami Krīvejis kara nūzīgumi.

Rēzekne

• 24. februarī 14 stuņdēs Rēzeknis Centralajā bibliotekā (Atbreivuošonys aleja 81, 3. stuovā) gaidoma Margaritas Černenko lekceja “Ukraiņu valoda – poētiska un romantiska”.
• 24. februarī nu 15 da 19 stuņžu Nacionalūs bīdreibu kulturys nomā (Atbreivuošonys aleja 97) – Maskiešonuos teiklu peišonys darbneica i zīdojumu vuokšona Ukrainys armejis karaveirim.
• 24. februarī 13.30 stuņdēs Latgolys Kulturviesturis muzejā byus meistardarbneica “Māla pieskāriens”. Muola suveniru izgataveišona ar latvīšu i ukraiņu rūtuojumim, ekspozicejis “Māla un uguns pārvērtību radīts brīnums” apsavieršona, virtualuos kaitys “Māla pavēlnieks” izspieļuošona.
• Nu 15 da 28. februara Rēzeknis Centralajā bibliotekā (Atbreivuošonys aleja 81, 3. stuovā) apsaverama izstuode “Ukraiņu valoda”.

Rēzeknis nūvods

Taipoš kai 2024. godā, ari itūgod desmit Rēzeknis nūvoda kulturys centrūs teik organizātys sveču līšonys darbneicys:
– 24. februārī 17 stuņdēs Greiškānu kulturys nomā (Centraluo īla 27, Sprūžova);
– 24. februārī 17 stuņdēs Leņdžu kulturys nomā (Vyraudys īla 3, Leņdži), papyldus byus ari interaktiva nūdarbeiba ar Zemissardzis 32. kuojinīku bataļjona lekceju “Sabiedrības noturība un gatavība krīzei. 72 stundu koncepts”.
– 24. februārī 17 stuņdēs jaunīšu centrā “Buras” (Rāznys īla 34, Kaunata);
– 24. februārī 17 stuņdēs Viļānu kulturys nomā (Kulturys laukums 2, Viļāni);
– 24. februārī 13 i 16 stuņdēs Maltys kulturys nomā (1. maja īla 80, Malta);
– 24. februārī 13 stuņdēs Dekšuoru kūpīnu resursu centrā (Nuokūtnis īla 2, Dekšuoris);
– 24. februārī 10 stuņdēs Veremu tautys nomā (Centra īla 4, Sondori–Škeneva);
– 24. februārī 12 stuņdēs Feimaņu kulturys nomā (Pogosta sāta, Feimani);
– 24. februārī 11.30 stuņdēs Strūžānu kulturys nomā (Mīra īla 14, Strūžāni);
– 24. februārī 11.30 stuņdēs Sakstagola sabīdryskūs aktivitašu centrā (Kolna īla 2, Sakstagols).