Rokstu sagataveja: portals lakuga.lv

Vēļ da 25. apreļa ir vareiba dasaceit daleibai guojīnī “Apveļc sovu tautystārpu par gūdu Latvejai!”, kas nūtiks Latvejis Republikys Naatkareibys atjaunuošonys dīnā, 4. majā, 12 stuņdēs Daugovpilī nu dzeļžaceļa stacejis vierzeibā pa Reigys īlu da Vīneibys laukumam.

Guojīnī teik aicynuoti pīsadaleit kai individuali interesenti, tai ari grupys i kolektivi. Dasacejuma anketa (atrūnama ITE) juonūsyuta iz e-postu leonova@vienibasnams.lv, davīnojūt ari guojīnī demonstriejamuo tautystārpa fotografejis digitalā formatā ar lobu izškiertspieju, kab piec īspiejis piļneiguok byutu radzams tautystārpa kūpskots i detalis. Ar guojīņa nūlykumu var īpasazeit ITE. Guojīni organizej Daugovpiļs vaļstspiļsātys pošvaļdeibys īstuodis “Vīneibys noms” Latvīšu i latgalīšu kulturys centrys.

Reigā itaids guojīņs teik reikuots jau nu 2016. gods, tuo organizatori ir tautystārpu centrs “Senā klēts”, kulturys i tautys muokslys centrs “Ritums” i bīdreiba “Mans tautastērps”. Tys bejs ari īdviesmis olūts paraudzeit kū leidzeigu sataiseit Daugovpilī. Organizatoru vuordā tū komentej Daugovpiļs Vīneibys noma vadeituoja Diāna Soldāne: “Itūgod, styprynojūt sovu pīdareibys sajiutu Latvejai i popularizejūt tautystārpu, izdūmuojom, ka itei šmukuo tradiceja juoīnas ari Latgolā. Vaļsts svātkūs aicynojam byut kūpā, simbolizejūt cīšu vīnuoteibu i popularizejūt latvīšu i cytu tautystārpu darynuošonu i volkuošonu.” Jei ari dasoka, ka guojīnī aicynuoti pīsadaleit piļneigi vysi, ari tī, kuri īt nu cytu piļsātu voi nūvodu.

Guojīnī var pīsadaleit ar autentiskim tautystārpim i tūs atdarynuojumim, daleibai nateik pījimti stilizāti tautystārpi.