Rokstu sagataveja: portals lakuga.lv

“Na vysod piec kulturys juosadūd uorā nu sātys,” tai soka ituos nedelis kulturys īsacejumu autore Ruta Priede, kura kasdīnā dorbojās kai regionalais remigracejis projektu koordinatore. Jei īsoka mozū kultureņu veiduot pi seve sātā i aicynoj attaiseit vacūs saimis biļžu albumus.

Kūpā apsavērt saimis biļžu albumus

Aicynoju sevkuru atrast laiku i attaiseit saimis biļžu albumus, tys byus interesanti kai pošim, tai ari jiusu atlasem. Pošim byus prīca īgrimt atmiņuos, sovpus mozuokim byus interesanti klauseitīs i dazynuot, kū naviņ jaunu par sevi pošu, kod vēļ beja mozeni, par babu i dzedu dzeivem. Arī tautīšim, kas dzeivoj uorzemēs, tys byutu breineigs veids, kai atguoduot i atsagrīzt laikā, kod dīnys tyka pavadeitys Latgolā, veids, kai sovus bārnus īpazeistynout ar sovys saimis tradicejom.
Oranžais “Moskvič” beja muna pyrmuo mašyna, ar kurū brauču piec vadeituoja tīseibu dabuošonys. Episkys atminis, lelyski pīdzeivuojumi, iz kurim tik jauneibā varēja pasaraksteit. Sovpus ūtrā biļdē asmu kūpā ar tēti rudiņa buļbu tolkā – mes bejom namaineigs tandems kai pavasara, tai rudiņa dorbūs, kam es beju pi zyrga apaušu, cikom tēte pi orkla. Cīši sirsneigys i personeigys atminis.

Īsagrīzt mozuokūs celeņūs

Braucūt pa kasdīnys celim, īsoku cytreiz spontani nūsagrīzt pa kaidu mozuoku celeņu. Tai mes ar saimi dorom gona bīži, vylynoj, pīmāram, vītys nūsaukums Kategrade, gribīs dazynuot, kai tod tī izaver. Ituo pavasara nasenejuo ašuo ideja beja īsagrīzt Ostrovys putynu vāruošonys tūrnī Augšdaugovys nūvoda Vyšku pusē. Kod esi tūrņa viersyunē, pasaver breineigs skots iz treis azarim. Te ocu augstumā apleik lidoj putyni, var dzierdēt vysaiduoku putynu bolsus i ari dazynuot, kas tod tī ir par putynim. Ka telefonā zamynluodiesi lītuotni, kas atpazeist putynu bolsus, es īsoku “Picture Bird”, tod tys tiks par rikteigu pīdzeivuojumu, plus sporteņš, kuopūt tūrnī!

Pagasteit tekstila studejā “Lama Dazz” Daugovpilī

Tekstila studejis “Lama Dazz” apmekliejums ir pošys ituo gods apsajimšona, kurū nūteikti grybu eistynuot. Ar studejis radeituoju Darju Smirnovu asam pazeistamys jau vasalu myužeibu. Darja sovulaik ir vuicejusēs Anglejā, bet ir atsagrīzuse Daugavpilī i aktivi dorbojās. Maņ cīši simpatizej juos iniciativa veiduot rūkdorbu kūpīnu i iznest rūkdorbu radeišonu uorpus īrostūs ramu. Īsoku pasekuot leidza studejis aktivitatem jūs Facebook lopā ITE, kab atrast sev pīmāruotuokū aktivitati i īgrimt radeišonys procesā – adeišonā, tamburiešonā, gleznuošonā ar akvarelim, filciešonā. 6. aprelī Darja aicynoj iz serumu-kremu pagatavuošonys meistarklasi kūpā ar serumneicu “Dzīvie”. Pi čaja kruškys varēs dazynuot i izsmaržuot, piečuok izgataveit sev serumkremu leidza jimšonai – taišni taidu, kaids vysuvaira patiks.

Dūtīs uorpus sātys

Pavasars ir rikteigi foršs laiks, kab dūtīs uorā nu sātys, deļtam aicynoju īplānuot kai īrostus, tai ari naīrostus maršrutus – par pīmāru, apmeklēt svātdīnis dīvakolpuojumu Aglyunys bazilikā, piec tuo īsagrīzt mozuos kopejneicuos i atbaļsteit vītejūs ļauds, pīmāram, kopejneica “Somersēta” Aglyunā – byusit sev sareikuojuši mozūs svātkus! Mums pošim kasdīnā juosavuica saredzēt i bīžuok veiduot prīceigys šaļts!