Rokstu sagataveja: portals lakuga.lv

24. julī 16.00 stuņdēs Rēzeknis Centralajā bibliotekā nūtiks tulkuošonys darbneica i saruna ar tulkuotuoju Māru Poļakovu, informej nūtikšonys organizatori. Pasuokuma pyrmajā daļā byus vareiba vuiceitīs tulkuošonys i atdzejis pamatprincipus, pīsavieršūt myusu dīnu ukraiņu literaturai, aktualizejūt raksteituo vuorda nūzeimi kara, eksistencialys krizis, vardarbeibys apstuokļūs. Sovpus tuo ūtrajā daļā sarunā par identitati, latgalīšu volūdu i tuos izmontuošonu tulkuojumūs pīsadaleis ari literate Ligija Purinaša.

“Tulkojūt tu teic vystyvuok tekstam, īej autora vuordūs i padori tūs par sovejim. Tok ukraiņu literaturys tulkuošona nav akademiska nūsadorbuošona; tulkuot ukraiņu autorus nūzeimej sagiut puori laikam i tuoļumam snāgtū rūku, turētīs i nūturēt. Darbneicā struoduosim ar myusu laikabīdru tekstim, da kaula sajiutūt, kai ir – niu byut Ukrainā,” stuosta Māra Poļakova.

Literatura veicynoj, paplašynoj dūmuošonu, tok laika pūsmā nu 1988. da 2016. goda latvyski nav izguojuse nivīna ukraiņu prozys gruomota, tik pādejā desmitgadē, lelā mārā pasasokūt Mārys Poļakovys, Ingmārys Baluodis, Māra Salēja i cytu tulkuotuoju naatsluobstūšai interesei, ir suokusēs koč cik mierktīceiga vierzeiba tulkuošonā. Ari latgalīšu literatura vys vēļ turpynoj byut latvīšu literaturys mozuokuo muosa, kas sasadur ar daudzim izaicynuojumim i ideologiskā (aizsprīdumi, stereotipi, zamais volūdys prestižs), i praktiskā (gramatika, volūdys lītuotuoju skaita samazynuojums) leiminī, viestej pasuokuma organizori.

“Kod Māra maņ pastuosteja ideju par darbneicu, nabeja diveju dūmu – mums tuo vajag! Es dūmoju, ka latgalīšim i ukrainim ir vaira kūpeiguo nakai suokumā varātu ruodeitīs. Mes labi zynim, kū nūzeimoj dzeivuot apstuokļūs, kod tova dzymtuo volūda ir aizlīgta, diskrimināta, apdraudāta. Ari mums, taipat kai ukrainim, volūda ir gūda līta, pošcīna vaicuojums,” pastreipoj Ligija Purinaša.

Māra Poļakova (1975) ir iztulkuojuse vaira nakai 100 gruomotu nu angļu, vuocu, ukraiņu, boltkrīvu volūdys i ivrita. Tymā skaitā Viktora Marcineviča romanu “Mova”, Jichoka Baševa Zingera romanu “Šoša”, vairuokus Serhija Žadana romanus, Oksanys Zabužko gruomotys i tt. Interveju ar Māru var puorskaiteit ITE.

Ligija Purinaša (1991) ir literate. Izdavuse treis dzejis kruojumus: “Sīvīte” (2019), “Pierobežas” (2022), “Magnificat” (2025). Juos dzeja tulkuota angļu, vuocu, čehu volūdā. Aktivai viestej par latgalīšu volūdu Latvejā i uorzemēs.