Rokstu sagataveja: portals lakuga.lv

Grupa “Laimas Muzykanti”, kas teik saukti par Latvejis etnoroka vizitkarti i žanra veteranim, itūgod svieteis 30 godu skotivis darbeibys jubileju. Svineibys paradzātys divejūs eipašūs koncertūs – pyrmais nūtiks ituo gods 6. decembrī Latgolys viestnīceibā “Gors”, Rēzeknē, sovpus ūtrys – cyta gods 20. janvarī VEF Kulturys pilī, Reigā, viestej grupys puorstuovi.

Koncerti paradzāti kai sirsneiga muzykala sasatikšona ar sovim klauseituojim i bejušajim grupys dalinīkim. Eipašī gosti byus Olga Rajecka, Kristīne Kārkle-Kalniņa, Inga Zeile, Baiba Ērgle – muzikis, ar kurom grupai bejuse rodūša i skaista sadarbeiba daudzu godu garumā.

Klauseituojim byus vareiba baudeit meiluokuos dzīsmis, pīmāram, “Meitu muote”, “Tuoli dzeivoj”, “Vokors īt”, “Krūga Madaleņa”, “Ķēvīt, mana svilpastīte” i cytys. Byus ari muzykali puorsteigumi.

30 godu laikā daudz kas ir puorsamejs, tok niu grupys kūdulu veidoj tuos dybynuotuojs Artūrs Uškāns (bolss, akordeons, garmane, dūdys, kūkle, stabule i c.), Dārta Drava (bolss, vejūle), Diāna Logina (bolss, mandolina, stabulis), Armands Varslavāns (gitarys), Matīss Uškāns (bungys) i Kristaps Strods (basgitara).

Kai stuosta “Laimas Muzykantu” dybynuotuojs Artūrs Uškāns, grupa vysus sovus klauseituojus gaideis iz divejim eipašim koncertim. “Koč ari grupys niulejā sastuovā vysi ir latgalīši, mes vysi dzeivojam Reigā, deļtam vīns koncerts byus Latgolys “Gorā”, sovpus ūtrys – VEF Kulturys pilī. Obeji koncerti byus eistyna draugu sasatikšona, kur pīsadaleis kai grupys veteranu veterani, tai ilggadeji draugi, atskaņuosim vysys lobuokuos pa 30 godim topušuos dzīsmis,” tai Artūrs Uškāns.

Grupa “Laimas Muzykanti” ir dybynuota 1995. godā Daugovpilī, tuos dybynuotuojs i vadeituojs vysus godus ir bejs multimuokslinīks Artūrs Uškāns. Grupys radeituo muzyka ir īcīneita na tik Latvejā, tok koncerti nūtykuši ari daudzvīt pasaulē – Leitovā, ASV, Kanadā, Australejā, Turcejā, Pūlejā, Ungarejā, Vuocejā, Italejā i c. 2018. godā “Laimas Muzykanti” puorstuovēja Latveju XXIII zīmys Olimpiskūs spēļu Phjončhanā Dīnavydkorejā kulturys programā, kur snēdze pīcus koncertus. Divejis uzastuošonys nu “Alpensia Sky Jumping” stadiona tyka raideitys TV tīšraidē vysā pasaulī.