Rokstu sagataveja: portals lakuga.lv

Zīmyssvātku nedelis kulturys īsacejumus portalam sagatavejusi ausšonys darbneicys “Indra” vadeituoja Olga Jokste. Sūpluok ausšonai Olga pādejūs godu laikā gūdā cāluse ari Kruoslovys pusis cymdu rokstus – izpietejuse tūs i meistarklasēs rauga nūdūt sovys zynuošonys tuoļuok. Olga aicynoj myus pasavērt apleik i atrast svātku laikā gaismu kūpā byušonā – kaidā koncertā, svātkim izrūtuotajās egleitēs i piparkūku smuordā.

Juobrauc meklēt skaistuokū egleiti

Itūgod Zīmyssvātki īkreit cīši tymsā laikā – nav snīga, gaišuma grībīs vairuok nakai citom reizem. Lai svātkūs byutu vaira gaismys, juobrauc meklēt skaistuokū egleiti. Vysuos piļsātuos i pogostūs ir īdagtys Zīmyssvātku egleitis, i tuos dūd prīcu pošu cylvākim i prīcynoj gostūs atbraukušūs. Nūteikti juoapsaver Kruoslovys egle, kura aug piļsātys laukumā, tok Zīmyssvātku laikā palīk par svātku egli. Indrys parkā jau na pyrmū godu “izaugušys” tamburātys eglis, kuruos taisejušys Indrys rūkdarbneicys.

Juocap piparkūkys ar vysu saimi

Zīmyssvātki tyvojās plotim sūlim, i juosuok gataveitīs aiz laika. Loba nūdarbe ir piparkūku cepšona, kas aizjam treis dīnys – pyrmajā meica meikli, ūtrajā – cap, trešajā – rūtoj. Treis dīnys sāta smuorduos piec kanieļa, ingvera, krystnagleņu i mada. I lelu prīcu dūs dorbuošonuos vysai saimei kūpā.

Zīmyssvātku gaismu juoatrūn koncertā

Zīmyssvātkūs gribīs gaismu, prīcu, mīru, labesteibu, i tū 26. decembrī varēs atrast Kruoslovys kulturys noma vokaluo ansambļa “Noktirne” i sīvīšu kora “Nova” koncertā “Ziemassvētku gaismā” Kombuļu tautys nomā. Lai prīceigi svātki!