Rokstu sagataveja: portals lakuga.lv

Iz Latvejis Republikys breiveibys svātkim pi klauseituoju tykuse jauna dzīsmis “Sudobrā” verseja i tuos videoklips. Dzīsmis vuordu autore ir dzejneica Ineta Atpile-Jugane, muzykys – Guntra Kuzmina-Jukna, dzīd Rēzeknis suokumškolys zānu kors “Vokālā iedvesma”, Latgolys Muzykys i muokslys vydsškolys zānu kors, kai ari Rēzeknis Kulturys i turysma centra veiru kors “Graidi”.

Kai stuosta komponiste Guntra Kuzmina-Jukna, dzīsme sadarbeibā ar Inetu Atpili-Jugani radeita jau paseņ, 2019. godā, deļ rodūšuo projekta “Dzeivis graidi” Latgolys viestnīceibā “Gors”. Laikam īmūt, itū dzīsmi vysaidūs notu puorlykumūs vaicuojuši vairuoki kolektivu vadeituoji. “Ruodejuos, ka ir vārts īraksteit dzīsmi i izveiduot atmiņā palīkūšu videoklipu. Sapulcynuoju puišus i veirus i saceju: “Maņ ir ideja, dorom!”
Entuziasmys beja napuorprūtams – eipašs paļdis koru dirigentim Juoņam Mežinskim i Juoņam Veličko,” doluos Guntra Kuzmina-Jukna. Dzīsmis skaņu īrokstu veiduoja Guntars Polavskis, video fiļmēja Ivars Utināns.

“”Sudobrā” ir muzykals stuosts par spāku, kū nūdūmam nu paaudzis paaudzē, nu tāvu dālim. Dzīsme apvīnoj veiru i zānu korus vīnā skaniejumā, simboliski atkluojūt sakņu napuortraukteibu, latgaliskū goru i vierteibys, kas sasagloboj puori laikim. Videoklipā ari radzams, kai sasavyn Latgolys doba, kūpā byušona i spāks, kas dzeivoj tradicejuos, bolsūs i atmiņuos. Itei dzīsme atguodynoj par tū, ka breiveiba suocās ar cylvākim, kuri globoj sovu volūdu i saknis, deļtam ruodejuos zeimeigi videoklipu nūdūd klauseituojim 4. maja vaļsts svātkūs,” tai Guntra Kuzmina-Jukna.