Rokstu sagataveja: portals lakuga.lv

Hiphopa apvīneiba “Latgalīšu reps” eisai pyrma Juoņa dīnys klauseituoju viertiejumam nūdeve jaunu singlu i videoklipu “Vasaras grūvs” – dzīsmi, kurā hiphopa energeja sasavyn ar džeza nūskaņom i vīgli vasareigu atmosferu, viestej muziki.

“Vasaras grūvs” ir stuosts par ceļu nu švuorbu i ceinis par sevi da spiejai īelpuot pylnu kryuti i ļaut dzeivei plyust sovā rytmā. Dzīsme īmīsoj vosorys breiveibys sajiutu – draugu byušonu kluotyn, gunkura guni i vokorus, kurūs nav svareigu plānu voi datumu. Dzīsmis viestejums atguodynoj, ka na vysam dzeivē juobyut perfekti saplānuotam, reizem svareiguokais ir vīnkuorši byut kluotyn i izbaudeit šaļti.

Itū nūskaņu papyldynoj ari videoklips, kura sižets veiduots kai vīglys vosorys pīdzeivuojums. Draugu kompaneja īsalauž greznā sātā, kur atrūn VHS videokameru i suoc dokumentēt spontani sareikuotu balleiti. Fiļmejūt nūtykumus ar retro kameru, jaunīši izbauda bezryupeigu vosorys dīnu bez īrūbežuojumu.

Stuosts teik pi nagaideita paviersīņa, kod sātā īsarūn baseina teireituoji, kurūs atveidoj poši “Latgalīšu repa” dalinīki. Tuo vītā, kab puortrauktu balleiti, jī izdūmoj tai pīsavīnuot. Tok šaļtī, kod sātā īsarūn saiminīks, vysa kompaneja matās bēgt ar “Vespa” motorolerim i velosipedim. Pīdzeivuojums nūsaslādz jiurys krostā, kur draugi sasateik pi gunkura, kūpeigi svietejūt vosoru i tuos snāgtū breiveibys sajiutu.

Dzīsmis teksta autors ir Didzis Kozlovs i Ivo Grigalis, kurī kūpā Jāni Šmēdiņu (Prime Time Studio) veiduojuši ari muzyku i skanis apstruodi. Īrokstā pīsadola ari Matīss Repsis (tausteni) i Rihards Špacs (bungys).

Videoklipa režisors i operators ir Tuoms (Toms) Auziņš, kurs īmyužynuojs dzīsmis golvonū ideju – vosoru kai laiku, kod svareiguokais ir draugi, spontanys idejis i spieja baudeit kotru šaļti.