Rokstu sagataveja: portals lakuga.lv

Nu 29. juļa da 2. augusta Zīmeļlatgolā nūtiks jau pīktais storptautyskais folklorys festivals “Lipa Kust”, informej tuo organizatori. Itūgod sūpluok vītejom Zīmeļlatgolys kūpom i etnografiskajim ansamblim festivalā pīsadaleis gosti nu Reigys, Pūlejis i Indejis. Īspaideigys svātku nūtikšonys, koncerti i daņču vokori pīskandynuos Bolvus, Viļaku i Upīti, kai ari gasteis Modūnis nūvoda Borkovā. Eipaša nūtikšona itūgod byus veļteita izcyluos Zīmeļlatgolys teiciejis Margaritys Šakinys symtgadei.

Itūgod festivalā tuolūs ceļus brauks i sovu kulturu ruodeis Pūlejis folklorys kūpa “Perła Warmii” i gosti nu Indejis – kūpa “Lok Nach”. Latvejis tradicionalū kulturu puorstuovēs vītejī Zīmeļlatgolys kolektivi, kai ari gosti nu Reigys – tradicionaluos dzīduošonys grupa “Saucējas” i Liporu saime. Festivala laikā nūtiks na tik koncerti, bet ari meistardarbneicys i daņču vokori, sovutīs 1. augustā festivals laissīs izbraukumā iz Modūnis nūvoda Borkovu, kab kuplynuotu 25. Tautys muzykantu svātkus.

Tradicionali vīna nu naatjamamu i azartiskuokūs festivala “Lipa Kust” sastuovdaļu ir “Styprūs skriejīns”. Tymā kai uorvaļstu gostu kūpys, tai sevkurs cyts interesents teik aicynuots puorbaudeit sovu spāku, izveiceibu, ospruoteibu i atraktivitati vysaidūs viļteigūs aizdavumūs, kas izvītuoti pa vysu Upītis cīmu.

Festivala lelais atkluošonys koncerts izskanēs 30. julī 18 stuņdēs Bolvu Kulturys i atpyutys centrā. Sovutīs eipaši sirsneiga i goreiga šaļts gaidoma 1. augustā Viļakys katuoļu bazneicā, kur 10 stuņdēs byus aizlyugums par izcylū Zīmeļlatgolys teicieju Margaritu Šakinu, kam sekuos juos 100 godu jubilejai veļteits koncerts. Festivala kulminaceja i lelais nūslāgums plānuots 2. augustā 16 stuņdēs Upītē ar dzīsmem, mozūs ražuotuoju tierdzeņu i īspaideigim daņčim kūpā ar folklorys kūpys “Upīte” muzykantim.

Idejis autors i golvonais organizators, Bolvu nūvoda Namaterialuos kulturys montuojuma centra “Upīte” direktors i folklorys kūpys “Upīte” vadeituojs Andris Slišāns stuosta: “Folklorys kūpa “Upīte” ir aktiva storptautyskūs festivalu apmaklātuoja, kura koncertējuse daudzvīt pasaulī i tykuse pi cīši lelys pīredzis. Itū sovu pīredzi nagribim turēt kai sveci zam pyura. Partū 2017. godā aizsuocem i niu kotru ūtrū godu turpynojam organizēt festivalu Zīmeļlatgolā, kurā apvīnojam lobuokuos i īspaideiguokuos idejis, kas nūsavārtys daudzūs pasauļa festivalūs.”