Rokstu sagataveja: portals lakuga.lv

20. septembrī 13.00 stuņdēs Rēzeknis nūvoda Iļžukolna tautys nomā nūtiks “Krystobu gūds”, kurā piec senejūs tradiceju tiks dūti vuordi pogosta folklorys kūpai i bārnu tautys deju kolektivam. Kai informej bīdreibys “Nautrānu kulturtelpai” puorstuove Inga Vigule, kolektivu krystobys byus eistyn latgaliskā stylā – ar kūmom i gostim nu tyvuoku i tuoļuoku cīmu, ar krystobu tradiceju izspieliešonu, dzīsmem i daņčim.

Rēzeknis nūvoda Iļžukolna pogosta daļa nu centra iz zīmelim ir pārnejuo gods rudinī Latvejis Nacionalajā namaterialuo kulturys montuojuma sarokstā īkļautuos Nautrānu kulturtelpys sastuovā. Inga Vigule stuosta, ka Iļžukolna pogostā teik kūptys tradicejis, dorbojās vairuoki amatnīki i tur ryupi par namaterialuo kulturys montuojuma saglobuošonu, atteisteibu i nūdūšonu tuoļuok. Tū paleidz dareit ari Iļžukolna tautys noma amatermuokslys kolektivi.

“Iļžukolna tautys noma folklorys kūpa dybynuota 1998. godā. Kūpys repertuarā ir latvīšu tautys senejuos dzeivis gudreibys, mutvuordu dailrade, ticiejumi – vierteibys, kū kūpys dalinīki i vadeituojs Ivans Laurs rauga saglobuot i nūdūt paaudzem iz prīšku. Tikom Iļžukolna tautys noma bārnu tautys deju kolektivs ir vēļ saleidzynojūši pavysam jauns – dybynuots 2020. godā. Kolektiva vadeituoja Silvija Nakonečnaja rauga bārnim īvuiceit latvīšu tautys deju pamatsūļus, stuojis veiduošonu i drūsmi uzastuot publikys prīškā,” nūruoda Inga Vigule.

Leidz šam obejim kolektivim naasūt bejs nūsaukuma ci vuorda, deļtuo 20. septembrī pasuokumā “Krystobu gūds” tim byus krystobys. Pasuokumā pīsadaleis Ambeļu pogosta folklorys kūpa “Speiga”, Veremu pogosta tautys noma folklorys kūpa “Vuorpa”, Veremu pogosta tautys noma videjuos paaudzis deju kolektivs “Kūzuls” i poši krystomī –  Iļžukolna pogosta tautys noma bārnu tautys deju kolektivs i Iļžukolna pogosta tautys noma folklorys kūpa.

Daleiba pasuokumā byus bez moksys. Tys nūtiks ar Vaļsts kulturkapitala fonda mierkprogramys “Nacionalajā namaterialuo kulturys montuojuma sarokstā īkļautūs elementu ilgtspiejis i atteisteibys programa” finansialu atbolstu. Projektu “Nautrānu kulturtelpys styprynuošona” realizej bīdreiba “Nautrānu kulturtelpai”.