Rokstu sagataveja: portals lakuga.lv

Muziks Sovvaļnīks publicējs teksta video dzīsmei “…i vīns”,  kas viestej par izvieļu izdareišonu. Dzīsmis teksta autors ir Oskars Seiksts, i pyrmatskaņuojumu tei pīdzeivuoja 2023. gods 30. novembrī pasuokumā “Literari muzykaluo Andrejdīna” Lūznovys muižā. Tok jau itū pīktdiņ, 25. septembrī, gaidoms Sovvaļnīka lelkoncerts Latgolys viestnīceibā “Gors”.

Teksta video autors dzīsmei “…i vīns” ir Dāvis Kots, ar kuru Sovvaļnīks ir sasadorbuojs ari pi cytu jaunuo albuma “Cārtumi” dzīšmu teksta video taiseišonys. Pats Sovvaļnīks par dzīsmi i klipu soka: “Doba vysod uzvarēs. Klipā ir paruodeits, ka mes asam īslāgti piļsātuos. Ir juoīt pi dobys, tī ir eistums i spāks.”

Dzīsmis īrokstā pīsadalejuši Sovvaļnīks, Mareks Gusāns i Gints Stankevičs. Dzīsmis īroksts taiseits Reigā, “Factory Sounds Studio” pi muzykys producenta Ginta Stankeviča.

Sovvaļnīks (eistajā vuordā Ingars Gusāns) ir latgalīšu muziks, kurs da ituo ir izdevs treis albumus – “Sūpluok” (2009), “Bolts susātivs” (2010) i “Napaseitynuots” (2016), kurūs asūšuos dzīsmis ir saraksteitys ar pazeistamūs latgalīšu dzejnīku (Ontona Kūkuoja, Annys Rancānis, Oskara Seiksta, Valentina Lukaševiča i cytu autoru) vuordim.

Sovvaļnīka jaunū albumu “Cārtumi” var nūsaklauseit ITE.

Albums “Cārtumi” izdūšonai tyka sagataveits ar Vaļsts kulturkapitala mierkprogramys “Latvīšu viesturyskūs zemu atteisteibys programa” i bīdreibys “Latgolys regiona atteisteibys agentura” atbolstu. Projektu eistynuoja bīdreiba “Latgolys Producentu Grupa”. Albuma prezentaceja i atsavieršona iz Sovvaļnīka dailradi nūtiks 2026. gods 25. septembrī Latgolys viestnīceibā “Gors” koncertā “Sovvaļnīkam – 18”.