Rokstu sagataveja: portals lakuga.lv

Rēzeknis Centraluo biblioteka turpynoj lekceju cyklu “Latgaliešu grāmatniecības pēdas”. Nūslādzūšuo lekceja gaidoma 15. oktobrī 13 stuņdēs, kod portala lakuga.lv redaktore Laura Melne īpazeistynuos ar 21. godu symta latgalīšu literaturu – autorim, izdeviejiem i tendencem. Pasuokuma nūslāgumā ari apmaklātuoji varēs izsaceit sovu redzīni voi pasadaleit pīredzē par gruomotu latgaliski skaiteišonu.

Rēzeknis Centraluo biblioteka 2026. godā pīduovoj treis izzynojūšys lekcejis projektā “Lekciju cikls “Latgaliešu grāmatniecības pēdas”, kurs teik eistynuots ar Vaļsts kulturkapitala fonda mierkprogramys “Latvīšu viesturyskūs zemu atteisteibys programa” i bīdreibys “Latgales reģiona attīstības aģentūra” atbolstu.

Bibliotekys puorstuovi pastreipoj, ka, aktualizejūt latgalīšu gruomatnīceibu i tuos viesturi, teik veicynuota kai izpratne par tuos nūzeimi, tai ituos jūmys dzeivuotspiejis styprynuošona. Projekts pīduovoj apsavērt latgalīšu gruomatnīceibys ceļu treis laika blokūs, cyklu aizsuocūt ar rokstu volūdys atteisteibu i pyrmajom gruomotom, turpynojūt ar latgalīšu gruomatnīceibu 20. godu symtā i nūslādzūt ar laikmeteigū literaturu, izdeviejdarbeibu i autorim. Da šam nūtykušys jau divejis lekcejis – “Pūliskuos raksteibys laiki latgalīšu gruomatnīceibā” (Lideja Leikuma) i “Latgalīšu literatura 20. godu symtā” (Valentins Lukaševičs).

15. oktobrī 13 stuņdēs Rēzeknis Centraluos bibliotekys laseitovā (3. stuovā) gaidoma trešuo i nūslādzūšuo projekta lekceja “Latgalīšu literatura 21. godu symtā: autori, izdevieji, tendencis”. Literate, viesturneica i portala lakuga.lv redaktore Laura Melne pasuokumā viesteis par nūzeimeiguokajim myusu dīnu latgalīšu literaturys autorim, izdavumim, izdeviejim i vierzīnim. Tiks dagrīzta viereiba aktualajim literarajim procesim i aktivitatem, kurys veicynoj jaunu daildorbu latgaliski radeišonu, kai ari īskicātys latgalīšu literaturys problemys. Nūslāgumā pasuokuma apmaklātuoji tiks aicynuoti diskutēt, pasadaleit sovā pīredzē i redzīnī.

Pasuokumu boguotynuos bibliotekys sagataveituo literaturys izstuode “Mūsdienu latgaliešu literatūras mozaīka”. Tei dūs vareibu īsavērt myusu dīnu latgalīšu literarajā ainovā, izgaismojūt spūdruokūs autorus, dorbus i tendencis 21. godu symtā. Īīšona pasuokumā bez moksys.