Portāla „LaKuGa”  klauseituojim Rēzeknis kapela „Dziga”  pīduovoj nūsaklauseit sova jaunuo albuma „Gotovs” pyrmū gobolu „Jumis”, atzeimejūt ražys laika nūslāgumu.

„Gotovs” ir jau pīktais kapelys „Dziga” albums aiz „Dzīd voi raudi, tautu meita”  (2000.), „Zaļā duorzeņā” (2001), „Jančuks Daņčuks” (2006.), „Lic, māmeņa, vainuceņu” (2008.). Jaunajā aļbumā, kas izdūts diska formātā, kapela pīduovoj tautys muzyku i dzīsmis, kurom apdaris radejuši kapelys draugi Edgars Lipors, komponisti Ilona Rupaine i Einārs Lipskis, kai ari poši „Dzigys” muzykanti. Dzīsmu izvēlē kapelu ir īdvasmuojis folklorists Aigars Lielbārdis. Leidz ar tū albuma muzykalais materials ir cīši daudzveideigs, a kapelys kūpejais skaniejums ir īgivs jaunys kruosys.

Jaunuo kapelys diska pyrmuo atruodeišona nūtyka Pasauļa latgalīšu saītā laikā ituo goda 3.augustā, a paguojušajā nedelis nūgalē, svātdiņ, 30.septembrī Mikeļdīnys godatiergā Rēzeknē kapela prezentēja jaunū albumu riezeknīšim i piļsātys gostim.

Kapelys „Dziga” sastuovā niule muzicej Ilmārs Dreļs (bolss, perkusejis, mandolina, kūkle), Kristīne Zeltiņa (bolss, perkusejis), Pīters Daugulis (bolss, blokflauta), Sandra Stare (bolss, perkusejis), Inga Stafecka (bolss, skripka), Andris Ušpelis (bolss), Anna Briška (bolss, skripka), kapelys vadeituoja Dace Visocka (akordeons, kūkle). Aļbuma „Gotovs” īrokstā pīsadaleja gon kapelys muzykanti, gon draugi Jānis Stafeckis (bolss, kontrabass), Einārs Lipskis (bolss, ceitara, perkuseji), Inga Drele (bolss), Ilona Rupaine (cymbala), Krišjānis Zeltiņš (bolss). Īroksts veikts Eināra Lipska skaņu studejā.

Par atbolstu aļbuma „Gotovs” izdūšonai kapela soka paļdis Vaļsts Kulturkapitala fonda Latgolys Kulturys atbolsta programmai, vītejom atbaļsteituojim – Rēzeknis nūvoda pošvaļdeibys kuļturys nūdalis vadeituojai Inārai Pleikšnei, SIA „Austrumlatvijas koncertzāle” vaļdis lūceklei Diānai Zirniņai.

Informaceju sagatavuoja Anna Briška

Vaira informacejis: kapela „Dziga”, Ilmārs Dreļs, mob. +371 29128199.