Senuotne ir dokuments, kurs pīškir tīseibys iz nuokūtnis ākys ceļšonu un izveiduošonu. Ari Latgola suoc atvērt nūdzeltejušuos viesturis lopys. Daudzī, un it seviški pādejī, izrokumi Vyšku pogostā ir līcinīki, kuri nūdūd pamatuotu līceibu par seņuos Latgolys augstū kulturu, līk vysim skateit Latgolu taidā gaismā, kaidā tū leidz šam vīnā ūtrā gadiejumā naīsadūmuojam. Tamdeļ kotra kulturys darbinīki, sabīdriska cylvāka un ikvīna tautīša pīnuokums byutu sekmēt šū lītu un nu sovys pusis nuokt tolkā kūpejuo dorba veikšonai.

Latgolys centralais muzejs dybynuots un dorbojās vodūtīs nu šim apsvārumim. Muzejs ar Rēzeknis piļsātys vaļdis laipnū pretimnuokšonu atsarūn piļsātys vaļdis nomā. Leidz šam te ir savuokti daudzi vierteigi eksemplari, kurus redzēt nūzeimoj muoceitīs. Vyss, kas te sasnāgts un panuokts ir kotrā ziņā apsveicams. Muzeja vadeiba te ir dariejuse pašreizejūs apstuokļūs vysu īspiejamū, bet panuokumi kotrā ziņā var daudzkuortuotīs, ja tolkā nuoktu myusu školuotuoju saime un nu sirds kartūs pi sovys senuotnis dokumentu kūpšonys – īvuoktu un uzruodeitu muzejam Latgolys sātuos pa pylna atrūnamūs viesturis līcinīkus un lītys ar muzeja vierteibu. Latgolys školuotuoji te varātu un viņu svāts pīnuokums, kaut ari naraksteits, byutu veikt šū vierteigū kulturali viesturiskū dorbu. Tys, prūtams, ari ir īspiejams, ja tikai ir loba gryba. Sovys školys apkuortnē kotrs var atrast īspieju izzynuot kur un kas pīmāruots byutu atrūnams. Vajadzeibys gadiejuma montys tiks samoksuotys. Carams vystyvuokajā nuokūtnē tys ari tiks dareits un uz tū juovielej lobys sekmis.

Vysys muzejam dūmuotuos montys pīteicamys voi nūdūdamys puorzinei Teklei Bērziņš Rēzeknis piļsātys vaļdē, voi piļsātys bibliotekā.

Latgolys centralais muzejs atsarūn kūpa ar piļsātys muzeju un kūpā ar Izgleiteibys ministrejas ceļojūšū muzeju. Ceļojūšais muzejs īvārojams ar tū, ka atrūdams vyss, kas napīcīšams un cīši īteicams kotrai školai.

Lai gon muzeja telpys jau palīk par šaurom, tod jamūt vārā attīceigūs īstuožu un personu pretimnuokšonu ari šis vaicuojums, cerams, vysā dreizumā nūsakuortuos labvieleigi. Ir jau laiks.

A.G.