Rokstu sagataveja: portals lakuga.lv

Itamā nedeļā grupa “Tautumeitas” izdavuse jaunu albumu, kas veļteits Juoņa dīnys laikam. Reizē ar albumu grupa aicynoj iz kasgadejū nūtikšonu “Rītausmas koncertrituālu” (Reita dzīsnys koncerta ritualu), kas itūgod nakti nu 19. iz 20. juni paradzāts Tukuma apleicīnis Sveikuļu kolnā. Kai jaunajā albumā, tai koncerta ritualā sova vīta ari dzīsmem latgaliski.

Jaunais “Tautumeitu” albums “Līgojami” ir jau sastais grupys diskografejā, bet pyrmais, kas piļneibā veļteits Juoņa dīnys laika dzīsmem. Kai viestej grupys izplateituo informaceja, albumā apkūpuotys dzīsmis, kuru saknis vaicojamys Juoņa dīnys tradicejuos, dobys rytmūs i ituo laika ritualūs. Albums taiseits divejuos atškireiguos nūskaņuos: daļa dzīšmu skaņ ar boguotu instrumentalū pavadejumu, kurā dominej rituali doncuošonys rytmi i puļsejūša energeja, bet ūtrei daļa atkluoj “Tautumeitu” bolsus jūs iz vysa ceistuokajā formā daudzbaļseibys harmonejuos, ļaunūt pylnā spākā izskanēt latvīšu tradicionaluos dzīduošonys spākam.

Albumā “Līgojami” īraksteitys 20 dzīsmis. Īroksts daīmams kai digitalā, tai i CD formatā. Vysu dzīšmu vydā pīcys skaņ i latgaliski: “Rūtoj, Saule”, “Ezereni”, “Lobvokori”, “Doncuot vežu” i “Treju reitu rosa”. Kai albuma publicitatis videoklipūs ir stuostejušys grupys dalineicys, vīna nu albuma meiluokūs dzīšmu jom pošom ir “Ezereni”. Kai pārņ intervejā portalam lakuga.lv saceja grupys lidere Asnate Rancāne, kuruos saknis vaicojamys Latgolys pusē (Baļtinovā i Skaistā), tod naasūt nikaida nūslāpuma, ka jai latgalīšu melodejis asūt tuos meiluokuos. “Juos ir atškireigys i koč kaidā ziņā ari vīnkuoršuok aranžēt. Latgalīšu dzīsmem ir taida cīši melodiska veišonuos, vairuoku notu izdzīduošona iz vīnys ziļbis, kas nav rakstureigi cytim nūvodim, i taišni tū mes cīši bīži meklejam,” stuosteja Asnate.

Latgaliskuos dzīsmis taipat kai īprīškejūs godūs skanēs ari ituo gods “Rītausmas koncertrituālā” Sveikuļu kolnā, kur “Tautumeitom” pīsavīnuos kai Saulkrostu Pērļu kors, Leitovys eksperimentaluos folkmuzykys muokslineica Petunija, taipat i folklorys i senejūs ceiņu kūpa “Vilkači”.

Sasarunojūt ar portalu lakuga.lv pyrma pārnejuo gods koncerta rituala, grupys dalineica Asnate pīzyna, ka Juoņa dīnys laiks ir eipašs ari pošai grupai, kam 22. junī ir juos dzimšonys dīna, 21. junī “Tautumeitu” dalineicys Katis Slišānis dzimšonys dīna, bet par reizi piec Juoņa dīnys svātkus svietej Laura Marta Līcīte. “Puorejom meitinem vosora i saulgrīži ir meiluokī svātki. Mes taidu cīši jaunu pasauli koncertūs naizdūmojam. Vysu myužu asam svietejušys Juoņa dīnu piec myusu saimis tradiceju, i tys, kai mes dorim koncerta ritualā ir tei poša pīredze, tik padareita spūdruoka ar scenografiskim rysynuojumim. [..] Tei nav koncertzāle. Doba var īsakruosuot sevkurā kruosā tamā naktī i reitā. Tei naparadzameiba ari roda mistiku i lelū nūtikšonu, kas mums ir cīši svareigs, doba mums ir cīši, cīši svareiga. Leidz ar tū es ari vysim vieleju Juoņa dīnā i na tik Juoņūs, bet vyspuor vosorā i dzeivē meklēt i atrast tuos šaļts, kas drupeit izvad nu komforta zonys, kam tī atsakluoj tys lelais rodūšums. Tū var braukt i pasasmeļt reita dzīsnys koncerta ritualā,” tai Asnate.