Rokstu sagataveja: portals lakuga.lv

Itūnedeļ Kuorsovā suocās latgaliskais jaunīšu seminars “Atzolys”. Īsacejumus vaicojam vīnai nu 2022. gods atzolīšu – Antrai Toporkovai. Antra ir MIKC “Latgolys Muzykys i muokslys vydsškola” izgleiteibys programys “Tradicionaluo muzyka” absolvente, kura niu Dānejis Nacionalajā muzykys akademejā turpynoj boguotynuot sovys etnomuzykys zynuošonys. Jei īsoka īpazeit Latgolai rakstureigus muzykys instrumentus, apmeklēt Ludzys piļsātys svātkus i nūsavērt kinu “Cylvāka bārns”.

Sasapazeit ar Latgolai rakstureigim muzykys instrumentim

Latgola ir sātys vīta kaidam cīši eipašam muzykys instrumentam – treisryndu ci Pīterpiļs garmanei. Tei ir eipaši gleita (prūtams, munūs īskotūs) bisonaruo (ar pliešu vierzīni mainuos ari skanis augstums) garmane, kurai pīmeit spieja izspieļuot na viņ mažorus (tī skaņ “prīceigi”), bet ari minorus (skaņ “biedeigi”). 

Tai ir saguojs, ka 9. augustā Ondrupinis lauku sātā byus breineiga vareiba sasapazeit na viņ ar itū pliešu instrumentu, bet ari ar cymbalom – Latgolā spieļuotim steigu instrumentim. Īsoku nūbraukt i sasapazeit ar sovai pusei unikalim instrumentim i varbyut pat pameklēt sātā iz ustobys, voi tī nastuov kas leidzeigs. 

Pagasteit Ludzā i baudeit piļsātys svātkus

Turpynojūt vosorys piļsātys svātku tradiceju, grybu aicynuot sajimt vysu īspiejamū nu svātku sezonys Ludzā. Programā var atrast teikamū kai sporta fani, tai saimis i ari tī, kas grib paļustēt pi labi zynomu muzykys gobolu. 

Nūsavērt legendarū kinu “Cylvāka bārns”

Pyrma eisa laiceņa tyka tei laime spieļuot muzyku Talsūs, vītā “KurTe” (nūteikti īsagrīzit!), kur gaismā guoja fakts, ka asu no Latgolys. Tod nu lyudzu, pyrmais teikums, kū es sadzierdieju: “Man tā patīk tā filma par Boņuku!”. I te juopīzeist – maņ ari cīši pateik tei kina par Boņuku. Vosorys pādejam mienešam suocūt sovu ceļu, īsoku sagaideit kaidu leitainu vokoru, nūskaidruot saimis meiluokū “TV iedīni” i soldonā nostalgejā īslēgt kinu “Cylvāka bārns”. Kina daīmama ITE.